ख्वःपय् नं बर्डफ्लू लुल

maitrinews

सूर्य्विनायक नगरपालिका–१ दधिकोटय् च्वंगु फार्मया खाचातय्के हाकनं एच–वान–एन–वान भाइरस बर्डफ्लू लुयावये धुंकाः अनया खाचात नष्ट याःगु दु ।
दधिकोटय् च्वंगु अनुस्कृत खाचा फार्मय् च्वंपिं ब्रोइलर खाचातय्के बर्डफ्लू लुयावयेधुंकाः वंगु चान्हय् खाचात स्याःगु खः ।
फार्म संचालक मधुराम न्यौपानेया खाचा फार्मय् ब्रोइलर खाचातय्के बर्डफ्लू जूगु लुयावयेधुंकाः वंगु चान्हय् निद्वः व निसःम्ह ब्रोइलर खाचा नष्ट याःगु खः ।
फार्मय् दुपिं खाचातय्के एच–वान–एन–वान भाइरस लुयावयेधुंकाः पशु सेवा विभागया प्राविधिक पुचः, स्थानीय जनप्रतिनिधि, प्रशासनया रोहबरय् खाचा नष्ट याःगु फार्म संचालक न्यौपानें जानकारी ब्यूगु दु ।
बर्डफ्लू संक्रमित लागाया प्यंगू किल्ला दुने खाचा नष्ट यानाः गाः म्हुयाः ल्हाकूगु दुसा खाली खोरयात संक्रमणमुक्त यासें बर्डफ्लू लिच्वः लाःगु लागाया खाचा फार्मय् चुना व भिर्कोन स्प्रे छ्वाकेगु ज्या याःगु दु ।
थ्वसिबें न्ह्यः वंगु बुधवाः वहे वडाया उत्कृष्ट बहुउद्देश्यीय कृषि फार्मया खाचातय्के नं बर्डफ्लू पुष्टि जुइधुंकाः २,९८५ लेयर्स खाचा नष्ट याःगु खः ।