ख्वपय् बिस्काः जात्रा न्ह्यात

maitrinews

ख्वपः । न्हूदँया आगमनलिसें ख्वपय् बिस्काः जात्रा न्ह्याःगु दु । म्हिगः बुधवाः सुथय् भैरवनाथया पूजा जुइधुंकाः न्ह्याःगु जात्राय् न्हिनय् स्थानीयबासी व सरकारी पूजा क्वचायेधुंकाः रथ सालेगु ज्या जूगु खः ।
न्हूदँया प्यन्हु न्ह्यःनिसें न्ह्यानाः न्हूदँया न्यान्हुतक न्ह्याइगु ख्वपया बिस्काः जात्रा अनया बासिन्दां च्याचा व गुन्हुतक तःजिक न्यायेकेगु याइगु खः । जात्राया न्हापांगु दिं सुथंनिसें भैरव व भद्रकालीया पूजा यानाः न्हिनय् निसें भैरवनाथ व भद्रकालीया रथ सालाः जात्रा न्यायेकेगु परम्परा दयाः वयाच्वंगु खः । परापूर्वकालनिसें न्ह्यानाः वयाच्वंगु विश्वप्रसिद्ध बिस्काः जात्रा नेवाः समुदायस न्यायेकीगु खः । थुगु जात्राय् तान्त्रिक विधि कथं निर्माण याइगु भैरव व भद्रकालीया रथ तौमधिं ख्वपया थःनेया लागा क्वाछेँ, साकोथा, सुकूध्वाखा, गोलमढी थ्यंकाः लितहयेगु प्रचलन दु । रथयात क्वःनेया लागाय् गःहिति थ्यंकेधुंकाः न्हापांगु दिंया रथजात्रा क्वचायेकेगु याइ । चैत्र मसान्तय् इन्द्रध्वजालिसेंया यःसिं थनीगु व बैशाख १ गते सनिलय् यःसिं क्वःथइगु याइसा बैशाख १ गते भेलुख्यलय् तःजिक जात्रा जुइ । थुगु दिं जात्रा स्वःसा शत्रुनाश जुइ धैगु जनविश्वास दयाः वयाच्वंगु दुसा उगु जात्रायात शत्रुहन्त जात्रा नं धायेगु याः ।