थौं जनबहाःद्यः रथ हनुमानध्वाखा थ्यंकी

सेतो मच्छिन्द्रनाथ रथयात्रा ११३९ व्यवस्थापन समितिं ब्यूगु जानकारी कथं थौं जनबहाःद्यः रथ जात्राया निन्हुया दिं आइतवाः सनिलया ५ ता इलय् जनबहाःद्यःया रथ असनं सालेगु तयारी जुयाच्वंगु दु । रथ हनुमानध्वाखा थ्यंकाः याः न्यायेकी ।
जात्राया झ्वलय् बैशाख २ गते सनिलया ४ ता इलय् हनुमानध्वाखा दरबार क्षेत्रं रथ सालाः लगमय् थ्यंकाः क्वचायेकीगु ज्याझ्वः दुसा बैशाख ३ गते सनिलया ५ ता इलय् रथं लगमय् च्वंगु जनबहाःद्यःया मां कथं कयातःगु मांसिमा स्वचाः चाःहिइकाः याः न्यायेकेगु याइ ।
थ्वहे झ्वलय् बैशाख ४ गते सनिलया ६ ता इलय् जनबहाःद्यःयात मच्छिन्द्रबहाः देगलय् दत बिज्याकी ।
जनबहाःद्यःया रथ म्हिगः शनिवाः अस्तमिया दि चैत्र ३० गते येँया जमलय् च्वंगु तीनधारा पाठशालां सालाः येँया असनय् थ्यंकाः याः न्यायेकूगु खः ।