नोट डाम क्याथेडल चर्चय्ं मिँ च्याःत

maitrinews

फ्रान्स । फ्रान्सया पेरिसय् च्वंगु ८५० दँ पुलांगु ऐतिहासिक नोट डाम क्याथेडल चर्चय् तच्वकं मिँ च्याःगु दु । मिँ चर्चया च्वय् च्वंगु ब्व खरानी जूगु अन्तर्रा्ष्ट्रिय संचार माध्यमं जानकारी ब्यूगु दु ।
निगू बेल टावर धाःसा सुरक्षित जूगु सरकारी अधिकारीपिन्सं जानकारी ब्यूगु दु । बीबीसीया कथं चर्चया मेगु कलाकृति क्षति मजुइकेत अग्निनियन्त्रकपिं खटेजुयाच्वंगु दु । अय्सां नियन्त्रकपिनिगु कुतः ताःलाःगु मदुनि । चर्चय् नेपाली ई कथं सोमवाः बहनी मिँ याःगु खः ।
फ्रान्सया इतिहास व सभ्यता कुबियाच्वंगु चर्चय् गुकथं मिँ च्यात धैगु सीमदुनि । अय्सां जिर्णोद्वारया ज्या जुयाच्वंगुलिं थुकिया सम्बन्ध मिँलिसे जुइफूगु अनुमान याःगु दु । फ्रान्सया राजधानी पेरिसया अभियोजनकर्ताया ज्याकुथिं घटनाबारे अनुसन्धान न्ह्याकूगु धाःगु दु । मिँ च्यायेधुंकाः चर्च थ्यंकूम्ह फ्रान्सया राष्ट्रपति इमानुएल म्याक्रोनं इतिहासय् क्षति जूगु धासें मिँ च्याःगु प्रति दुःख प्वंकादीगु दु । वय्कलं फ्रान्सेलीपिन्सं ल्हाःमाः हनाः चर्चयात पुलांगु अवस्थाय् हे पुनःनिर्माण यायेगु प्रतिबद्धता प्वंकादीगु दु ।