नेकपां थौं जिल्ला कमिटि एकता घोषणा याइगु

maitrinews

सत्तारुढ दल नेपाल कम्युनिष्ट पार्टी नेकपां थौं सोमवाः जिल्ला कमिटी एकता घोषणा याइगु जूगु दु । शीर्ष नेतापिं दथुइ सहमति जुइधुंकाः च्वंगु सचिवालय बैठकं थौं जिल्ला कमिटी घोषणा यायेगु निर्णय याःगु खः ।
ताःहाकःगु विवाद धुंकाः आइतवाः सनिलय् प्रधानमन्त्री निवास बालुवाटारय् च्वंगु सचिवालय बैठकं ७७ गू जिल्लाया नायः व छ्याञ्जे ल्ययेगु ज्या क्वचायेकूगु दु । जिल्लाया नायः व छ्याञ्जे निगुलिं पार्टीया जिल्ला प्रमुख कथं नायः च्वनीगु कथं न्हूगु मापदण्ड दयेकाः एकता क्वचायेकूगु प्रवक्ता श्रेष्ठं जानकारी बियादीगु दु ।
प्रवक्ता श्रेष्ठया कथं जनवर्गीय संगठनया नेतृत्व व पोलिटब्यूरो दुजःया नांधलः धाःसा क्वचायेके ल्यंदनि । छुं दिं दुने उगु ज्या नं मुक्कं निष्कर्षय् थ्यनीगु वय्कलं जानकारी बियादीगु दु । एकताया झ्वलय् ७७ गू जिल्लामध्ये ४४ गू जिल्लाया नेतृत्व तत्कालीन एमाले व ३३ गू जिल्लाया नेतृत्व तत्कालीन माओवादीं काःगु दु ।