‘शंखघर’ उपन्यास नेपाली भाषं नं पिदन

नेपालसंवतया प्रवर्तक राष्ट्रिय विभूती शंखधर साख्वाःया लुमन्तिइ पलिस्था यानातःगु राष्ट्रिय विभूती शंखघर साख्वाः प्रतिस्थानया ग्वसालय् नेवाः न्ह्यलुवाःलिसें साहित्यकार मल्ल के सुन्दरंं नेपालभाषां च्वयादीगु ‘शंखधर’ नांया उपन्यास नेपाली भासं नं पिदंगु दु ।
साहित्यकार अगिब बनेपालीं अनुवाद यानादीगु नेपाली भाषाया ‘शंखघर’ नांया ऐतिहासिक व्यक्तित्वया सम्वन्धय् आख्यानात्मक परिकल्पना याना तयार यानातःगु उपन्यास शुक्रवाः प्रज्ञाप्रतिस्थानय् उलेज्या जुया खः।
वाङ्मय शताव्दी पुरुष संस्कृतिविद् डा. सत्यमोहन जोशी, नेपाल प्रज्ञा प्रतिस्थानया कुलपति गंगाप्रसाद उप्रेती, नेपालभाषा एकेदेमिया चान्सलर चित्तरञ्जन नेपालीपिन्सं मंकाः कथं त्वाःदेवाय् मत च्याकाः ज्याझ्वःया उलेज्या यानादीगु खःसा वय्कःपिं स्वम्हसिनं हे मंकाः कथं सफू उलेज्या यानादीगु खः । अथेहे, विषयगत वक्ता प्रा. डा. अभि सुवेदीं सफूयात कयाः थःगु खँ तयादीगु खः ।
राष्ट्रिय विभूति शखधर साख्वाः प्रतिस्थानया नायः चन्दन कृष्ण श्रेष्ठया सभापतित्वय् न्ह्याःगु ज्याझ्वलय् नेवाः न्ह्यलुवाः एवं सफूया च्वमि मल्ल के सुन्दरं सुभाय् देछासें थुकथंया ज्याझ्वः थःगु जीवनय् तसकं उच्च जूगु धारणा तयादीगु खः ।