राष्ट्रपति भण्डरी बेइजिङं ल्हासा थ्यन

maitrinews

स्वनिगः । चीनया राजकीय भ्रमणय् झाँयादिम्हः राष्ट्रपति विद्यादेवी भण्डारी मंगलबाः बेइजिङं ल्हासा झाँयादिगु दु ।
राष्ट्रपति भण्डारीयात तिब्बत स्वशासित क्षेत्रया कार्यकारी उपाध्यक्ष चियाङ जीं ल्हासाया गोङ्गर विमानस्थलय् लसकुस याना दिगु खः । भ्रमणया झ्वलय् राष्ट्रपति भण्डारी बेइजिङय् आयोजना जुगु निक्वःगु बेल्ट एण्ड रोड फोरम फर इन्टरनेशनल कोअपरेशन अन्तरराष्ट्रिय ग्वहालीया नितिं निक्वःगु क्षेत्र तथा मार्ग दबुली ब्वती कया दवुयात सम्बोधन यानादिगु खः ।
सोमबाः ग्रेट हल अफ द पिपलय् निगु पक्षीय बैठकय् जुगु न्हेगु सम्झौताय् हस्ताक्षर जुगु खः ।
उगु सम्झौतामध्ये आर्थिक तथा प्राविधिक ग्वाहालीया सम्झौता कथं चीन सरकारं नेपाः यात जीवनस्तर बाँलमकेत, विपत्ति धुंकाया पुनःनिर्माण तथा आधारभूत संरचनाका क्षेत्रय् थः थः सहमतिया परियोजनाय् लगानी यायेत करिव एक अर्ब आरएमबीया ग्वाहाली बिगु बेइजिङस्थित नेपाः या दूतावासं जारी यागु विज्ञप्तिं न्हथंगु दु ।
राष्ट्रपति भण्डारी नापं परराष्ट्रमन्त्री प्रदीपकुमार ज्ञवाली, प्रदेश नं ३ या मुख्यमन्त्री डोरमणि पौडेल, सङ्घीय संसद्या दुजः, नेपाः सरकारया उच्च अधिकारी, चीनया नितिं नेपाः या राजदूत लीलामणि पौड्याल, नेपाःया नितिं चीनया राजदूत होउ याङ्छी, निजी क्षेत्रया प्रतिनिधि व सञ्चारकर्मीपिंस ब्वति कागु खः । राष्ट्रपति भण्डारी आः वइगु बैशाख १९ गते स्वदेश लिहाँ वइगु ज्याझ्वः दु ।