गुथि संस्थानं असंया कोथुननी थुनाः ब्यापारिक कम्प्लेक्स दयेकेत्यंगु विरोधय् थौं शुक्रवाः येँया असनय् विरोध सभा यात । गुथि संस्थानं कोथुननी थुनेत्यंग’ या विरोध सभाय् नेपाल कम्युनिष्ट पार्टीया सांसद रामबीर मानन्धरं असं थें जाःगु एतिहासिक थासय् ब्यापारिक कम्प्लेक्स दयेका बिइ मज्यूगु बिचाः तयादिल ।
नेपाली कांग्रेसया सांसद नापं रक्षा मन्त्री भीमसेनदास प्रधानं नेपाःया सम्पदाया नितिं तःघंगु संगठन दयेकेमाःगु बिचाः प्वंकादिल । अथेहे, समाजवादी नेपालया केन्द्रिय न्वकु हिसिला यमि नं असनय् ब्यापारिक कम्प्लेक्स मखु सम्पदा क्षेत्र दयेकेमाःगु धयादिल ।
ज्याझ्वलय् नेपाल कम्युनिष्ट पार्टीया केन्द्रिय दुजः अथेहे नेवाः मुक्ति मोर्चाया न्वकु सुरेश श्रेष्ठ पिन्सं न्ववानादिगु खः । अथे हे ज्याझ्वलय् समाजवादी नेपालया केन्द्रिय न्वकु हिसिला यमि नं असनय् ब्यापारिक कम्प्लेक्स मखु सम्पदा क्षेत्र दयेकेमाःगु माग यानादिल ।
उगु ज्याझ्वलय् उपत्यका सतक विस्तार पिडित संघर्ष समितिया न्वकु सरोज श्रेष्ठ, संम्पदा संघर्ष समितिया दुजः गणपति लाल श्रेष्ठ, संम्पदा समंक्षण अभियन्ता भरत जंगमपिनसं न्ववानादिगु खः । कोथुननी बचाऊ अभियानया संयोजक नमस्ते सायमिया सभापतित्वय् जुगु उगु सभाय् येँ महानगरपालिका २५ वडा अध्यक्ष नीलकाजी शाक्य नं नुँगः खँ तयादिगु खःसा कोथुननी बचाऊ अभियानया दुजः उमेश स्थापितं बिरोध सभा ज्याझ्वः यात कयाः न्ववानादिगु खः ।
