चिया उद्योगी व मजदुरबीच स्वंगु बुँदे सहमति

maitrinews

भद्रपुर । नेपाल चिया उत्पादक सङ्घं श्रम ऐन व नियमावलीया व्यवस्था जुगु कथं पारिश्रमिक बिइगु लिखित सहमति यायेधुंका चिया मजदुरपिसं आन्दोलन लित कागु दु । सरकारं तोके यागु न्यूनतम ज्याला बितः चिया बगान व उद्योगया सञ्चालकं मानेमजुसें गत चैत १७ गतेनिसें चिया मजदुर सडक आन्दोलनय् वगु खः ।
सोमबाः बहनि विर्तामोडय् नेपाल चिया उत्पादक सङ्घ व चिया मजदुरया थि थि सङ्घ सङ्गठनया वार्ता याइपिनि दथुइ स्वंगु बुँदे सहमति जुगु खः । वार्ताय् सहभागी अखिल नेपाल ट्रेड युनियन महासङ्घ १ नं प्रदेशया उपाध्यक्ष सन्तकुमार राईया कथं सहमतिया न्हापांगु बुँदाय् नेपाल सरकारं २०७५ साउन ३१ गते राजपत्रय् प्रकाशित याना चिया बगान तथा कारखानाय् ज्या याइपिं श्रमिकया नितिं तोके यागु न्यूनतम पारिश्रमिक आधारभूत तलब २३१ तकाः, भाः बढेजुगुया भत्ता १४५ तकाः व कारखानाय् ज्या याइपिं नाइके तथा चौकीदारया भत्ता ४२ तकाः चिया बगान व कारखानाय् कार्वान्यन याइगु उल्लेख यागु दु ।
साउननिसें मब्युगु पारिश्रमिक आः वैगु चैत मसान्ततक्कः उद्योगी पक्षं मजदुरयात भुक्तानी बिमागु सहमति जुगु दु । अथेहे, सहमतिया निगुगु बुँदाय् श्रम ऐन २०७४ व नियमावली २०७५ या व्यवस्था कथं नेपाल चिया उत्पादक सङ्घे आवद्ध चिया बगान तथा कारखानाय् कार्यान्वयन याइगु उल्लेख जुगु दु । अन्तिम बुँदाया सहमतिं चैत १७ गतेनिसें बन्द जुगु चिया बगान थौं निसें चाय्किगु व मजदुर ज्याय् लिहाँ वनिगु उल्लेख दु ।