राजपां महाधिवेशन याये मफुतः, विधान संशोधन

maitrinews

स्वनिगः । राष्ट्रिय जनता पार्टी नेपालं निर्वाचन आयोगं ब्युगु म्याददुने महाधिवेशन याये मफया पार्टीया बैधानिकता बचेयायेत विधान संशोधन यागु दु ।
राजपा नेपालया विधान २०७४ य् २ वर्षया दुने महाधिवेशन यायेगु उल्लेख जुगुलिं उगु अवधिं महाधिवेशन याये मफूसेलिं विधान संशोधन याना ३ वर्षया दुने यायेगु धागु दु ।
पार्टी विधानकथं निर्वाचन आयोगं २०७६ वैशाखदुने महाधिवेशन यायेत म्याद ब्युगु खः । तर उगु मितिं महाधिवेशन याये मफुगु अवस्थाय् राजपां असारतक्कःया ईँ माग यागु दु ।
पार्टीया वैधानिकता बचेयायेत विधान संशोधन याना ३ वर्षया दुने महाधिवेशन याये मागु व्यवस्था यागु छम्हः नेतां जानकारी बियादिल । राजपाया महाधिवेशनया लिपांगु मिति कात्तिक २८, २९ व ३० गतेया नितिं तोकेयागु दु । विधान संशोधन मजुसा राजपायात २०७६ असार मशान्तदुने महाधिवेशन याये हे माग बाध्यता दुगु खः ।
जेठ २ निसें ५ गतेतक्कः च्वंगु अध्यक्ष मण्डलया बैठकं विधान संशोधन याना अध्यक्ष मण्डलया व्यवस्था नं हटेयागु दु । विधानया दफा ३१ ९१२० य् थुकिं न्हापा महाधिवेशनलिपाः नं अध्यक्ष मण्डलया व्यवस्था दुगुलिं उकिं हटेयाना एकल अध्यक्ष जुइगु व्यवस्था यागु दु ।