स्रष्टाया सपनायात सरकारं साकार यायेमाः राष्ट्रपति

maitrinews

ओखलढुङ्गा । राष्ट्रपति विद्यादेवी भण्डारीं स्रष्टाया सपनायात सकलें मिलेजुया साकार यायेमागु धया दिगु दु ।
युगकवि सिद्धिचरण श्रेष्ठया १०८ औ जन्मजयन्तीया अवसरय् सिद्धिचरण नगरपालिका –१२ य् स्थापित वय्कया पूर्णकदया शालिक अनावरण तथा स्रष्टा उद्यानया उद्घाटन यासें राष्ट्रपति भण्डारीं स्रष्टाया सिर्जनां दशकौंँ न्यह् क्यंगु सपना साकार यायेगु दायित्व झिँके दुगु धयादिल । राष्ट्रपति भण्डारीले धयादिल, “युगकवि सिद्धिचरणसहितया सर्जकया योगदानं नेपाःया दिगो विकास व तःतधंगु ह्युपाले भूमिका म्हितुगु दु । उगु योगदानया झिँसः सम्मान यायेमा ।”
राष्ट्रपति भण्डारीं कला, साहित्य व खेलकुदया विकासका नितिं सरकारं नीतिगत पहल यायेमागुलिं जोड बियादिल । वय्कनं समृद्ध नेपाः व सुखी नेपाःमिं या लक्ष्यय् थ्यंकेत सरकारं दक्वः क्षेत्र व वर्गयात समेटे यायेमागु धयादिल । राष्ट्रपतिं जलस्रोतया सदुपयोग, पर्यटन प्रवद्र्धन व पुलाँगु कृषि प्रणालीयात आधुनिकीकरण याना समृद्धिया अभियानय् न्ह्यावने मागु धारणा तयादिल । रुम्जाटार विमानस्थलयात हाकनं सञ्चालनय् हयेत निर्माणाधीन दोभास विमानस्थलयात वैकल्पिक मार्गया रुपय् विकास यायेत ध्यानाकर्षण यासें विसं २०७४ वैशाख १ गते थःम्हः उद्घाटन यागु थोलेदेम्बा महोत्सवया निरन्तरता व उगु क्षेत्रय् जुगु विकासं थः सन्तुष्ट जुगु धयादिल ।
राष्ट्रपति भण्डारीं स्थानीय समुदाययात ज्या बितः उद्योगग्रामया अवधारणा हयेगु व स्वच्छ नागरिक व अब्बल खेलाडी उत्पादन यायेत विद्यालय तहनिसें नै थि थि कासाःया ज्याझ्वः न्ह्याकेत सुझाव बियादिल । स्वंगु हे तहया सरकारया प्राथमिकताय् लाःगु पर्यटन क्षेत्रया विकासे नेपाः यात समृद्ध यायेगु राष्ट्रपति भण्डारीया धाःपु खः ।