विपश्यनाः शान्तपुर्वक जीवन हनेगु कला

maitrinews

विपश्यना ध्यान बुद्धं स्यँना बिज्यागु चित्त विशोधन यायेगु विधि खः । थुगु विधि मिथ्या आडम्वर मदुगु पूर्ण रुपं वैज्ञानिक खः । विपश्यनाया अर्थ विशेष रुपं स्वँयगु खः । थःत थम्हः हे निरिक्षण यायेगु खः । श्वासप्रश्वासय् चित्त एकाग्र याना, अन्तरमुखी जुया शरिर नापं चित्तया यथाभूत स्वभाव व क्रियाको निरिक्षण यायेगु खः । स्वअनुभूतिया आधारय् उकिंया अनित्य व दुखमय निसार स्वभावयात थुइकेगु हे विपश्यना खः ।
विपश्यना विधिं दुग्यंक आशक्तिं अलग जुया मुक्त जीवन हनेगु कला स्यँनाबी । शील सदाचारी जीवन हनेगु व चित्तया एकाग्रतां मानव मनया शुसुप्त शक्ति जागृत याना थः थःगु कार्यक्षेत्रय् दक्ष यायेगु , प्रज्ञाया अभ्यास याना राग, द्धेष, काम, क्रोध, भय आशंका आदि अकुशलयात निर्मल याना चित्त विशुद्ध यायेगु थुकिंया प्रमुख उद्धेश्य खः । थुकिं मैत्री, करुणा, मुद्धिता व उपेक्षारुपी सद्गुणया विकास यायेत ग्वाहाली याई । उकिं याना मानव मानवया दथुई पारस्पारिक स्नेह, सहानुभूति , सहयोग , सहिष्णुता व स्वार्थविहिन सदुगुणया विकास जुई । थ्वहे विपश्यनाया सर्वहितकारी लक्ष्य खः । विपश्यनाया प्रशिक्षण धर्मय् दिक्षित यायेया नितिं खः । थन धर्मया अर्थ हिन्दु धर्म, बुद्ध धर्म मजुसें सार्वजनिन, सर्वहितकारी , सार्वकालिक, सनातन, मानव धर्म खः ।
विपश्यना विधियात सकसिनं अपुकः स्वीकार याये फइगु खः । सकसिया नितिं थ्वः समान रुपं कल्याणकारी जु । सुख व शान्ति जीवनय् सकसितं माः । तर विडम्बना सारा संसारय् अशान्ति जुयाच्वंगु दु । शान्तिपूर्वक जीवन हनेया नितिं झिसँ उकिंया कला सयेकेमाः । सत्य धर्म जीवन हनेगु कला खः । शुद्ध धर्मं झिँत सही अर्थय् म्वायेगु स्यँनाबी । थुकिँया नितिं सर्वप्रथम मन छु कारणं अशान्ति जुगु व थुइकी माः । गवले मन विकारं जाई , तव मन अशान्त जुई । उकिँया परिणाम थःगु सन्तुलन मदयेकी । रिस, इष्र्या, भय मवइगु वासः छु दु ? वहे वसाः नं मन अशान्त मजुइगु उपाय छु खः ? आखिर थुगु प्रकारया थि थि मनोविकार छाय् उत्पन्न जुई ?
अप्वः थें छुं अप्रिय घटनाया प्रतिक्रिमा स्वरुप मनोविकार उत्पन्न जुइगु खः । जीवनय् प्रतिकुल परिस्थिति उत्पन्न मजुइगु सम्भव मदु । जीवनय् प्रिय, अप्रिय निगु हे परिस्थिति वयाच्वनी । प्रयत्न झिँसं थ्वहे यायेमा कि प्रतिकुल परिस्थिति उत्पन्न जुसाः मनयात शान्त तये फयेमा । लय् कँ , कंकड आदि दयाहे च्वनी । तर उपाय थ्वहे कि भिँसः लाकाँ न्हाँय् । वाः फय् वई, निभाः त्वई, उकिं बचे जुइगु उपाए वहेँ खः कि कुसाः कुया जुई । अर्थात् प्रतिकुल परिस्थितिं नं झिँ थःगु सुरक्षा थःम्हः हे याये सयेकेमाः । सुया अन्तर मन शुद्ध जुई वयात पिनेयागु विकारं बाँमलागु प्रभाव जुईमखु । छुं नं वस्तुस्थितियात यथाभूत रुपं निरिक्षण याना विकारमुक्त जुई फयेकेगु हे विपश्यना खः ।