स्थानीय तहपाखें १५ हजार कर्मचारी फ्वन, विज्ञापन यासें लोकसेवा आयोग

maitrinews

स्वनिगः । न्हेगु प्रदेशय् १४ हजार ६ सय ७२ कर्मचारी माःगु विवरण संघीय मामिला तथा सामान्य प्रशासन मन्त्रालयं लोकसेवा आयोगयात छ्वँगु दु । ५५५ स्थानीय तहबं माग यागु कर्मचारीया ल्याः मन्त्रालयं लोकसेवायात छ्वगु खः । मन्त्रालयया प्रस्तावकथं लोकसेवां वइगु १५ जेठनिसें थि थि पदया कर्मचारीया विज्ञापन यायेगु तयारी यागु दु ।
लोकसेवां कर्मचारी आवेदनया कार्यतालिका सार्वजनिक यायेधुंकुगु दु । गुंगु तहया अप्राविधिक–प्राविधिक पदया खुला प्रतिस्पर्धाया परीक्षा भदौले वुइगु व असोजय् नतिजा प्रकाशित जुइगु लोकसेवां धागु दु । अन्तर्वार्ता व सिफारिस कात्तिके जुइगु खः ।
अथेहे, खुगु तहया अप्राविधिक पदया पदपूर्ति निगु चरणय् जुइगु दु । न्हापांगु चरणया परीक्षा साउनय् जुया उगु हे महिना नतिजा सार्वजनिक जुई । निगुगु चरणया परीक्षा भदौ–असोजय् जुया असोज–कात्तिकय् नतिजा वइगु खः ।
न्यागु तहया अप्राविधिक पदया न्हापांगु चरणया परीक्षा व नतिजा साउने हे जुइगु खः । अथेहे, प्यंगु तहया अप्राविधिक पदया पदपूर्ति खुलापाखें निगु चरणय् जुई । नहापांगु चरणया परीक्षा साउनय् जुया साउने हे नतिजा प्रकाशित यायेगु लोकसेवाको तयारी दु । निगुगु चरणया परीक्षा भदौ–असोजय् जुया नतिजा असोज–कात्तिकमा वइगु लोकसेवां धागु दु ।