परराष्ट्रमन्त्रीया गीतिनाटक , योगमायाया जलसमाधिनिसें ग्रेटर नेपाःतक्क

maitrinews

स्वनिगः । परराष्ट्रमन्त्री प्रदीपकुमार ज्ञवाली राजनीतिं जक मखु साहित्य नं सक्रिय जु । साहित्यय् ‘शीतविन्दु’ उपनामं मस्युम्हः ज्ञवाली गीतिनाटक ‘नेपाल–गाथा’ ज्वना वगु दु ।
नाटकय् रामापिथेकसनिसें गोपाल वंश, महिषपाल वंश, किरातकाल, लिच्छविकाल, मल्लकाल, शाहकाल, राणाकाल, राणाकालया अन्त्यया नितिं खुसिँ क्वःब्वाना योगमायां यागु जलसमाधितक्कया विषय दु ।
अथेहे, राणाकालया इले मृत्युदण्ड ब्युपिं शहीदया योगदान, प्रजातन्त्र प्राप्तिया ईं, २०१५ सालया आमनिर्वाचनलिपा विश्वेश्वरप्रसाद कोइराला प्रधानमन्त्री जुगु इले जनताय् दुगु उत्साह नं नाटकय् क्यना तगु दु ।
२०१७ राजा महेन्द्रं राज्यया दम्वः अधिकार थःगु ल्हाँतय् काय्धुंका आःतक्कःया महत्त्वपूर्ण राजनीतिक आन्दोलन व घटनाक्रम नाटकय् दु । नाटकय् ग्रेटर नेपाःया प्रसंग नं दुथ्यागु दु ।
रामापिथेकसनिसें थौतक्कःया नेपाःया इतिहास उत्खनन यागु गीति नाटक सोमबाः राष्ट्रिय नाचघरय् प्रदर्शन जुगु दु । नाटक राष्ट्रपति विद्यादेवी भण्डारी, उपराष्ट्रपति नन्दबहादुर पुन, प्रधानमन्त्री केपी शर्मा ओली, मन्त्री, पूर्वप्रधानमन्त्रीलगायतं सोमबाः अवलोकन यात ।
नाटक हाकनं मञ्चन याइगु आयोजकं धाःगु दु ।
नाटकया रचनाकार शीतविन्दुं नेपाःमिँ पिनिगु वास्तविक इतिहास वगु व इतिहासया स्मरण याकेत नाटक तयार यानागु धयादिल ।