प्रधानमन्त्री ओली युरोप भ्रमणय्

maitrinews

स्वनिगः । प्रधानमन्त्री केपी शर्मा ओली आपसी सम्बन्ध अझ बलाकेया नितिं व नेपाः नं आः यानाच्वंगु समृद्धिया लँयाबारे अवगत याकेत युरोपेली देँया स्वंगु मुलुकया औपचारिक भ्रमणया नितिं थौं उखेपाखेँ झाँयादिगु दु ।
छिमेकी मुलुकनापंया सम्बन्धय् अप्वः केन्द्रित जयाच्वंगु नेपाःया वैदेशिक नीति व सम्बन्धयात उकिं नं पिनेथ्यंक फैलेयायेत नेपाल सरकारया नीतिकथं प्रधानमन्त्री ओली युरोपेली मुलुक झाँयादिँ त्यंगु खः । संयुक्त राष्ट्र सङ्घया स्थायी दुजः बेलायत व फ्रान्सया नेपाःया पाखेँ ताःहाकगु ईः लिपा जुइत्यंगु थ्वः उच्चस्तरीय औपचारिक भ्रमणया विशेष महत्व जुई ।
प्रधानमन्त्री ओलीं थ्वहें जेठ ३२ गतेतक्कः स्विट्जरल्याण्ड, बेलायत व फ्रान्सया औपचारिक भ्रमण यानादिँ । नेपाःया दकले पुलाँगु दौत्य सम्बन्ध दुगु मुलुक बेलायतनापं बेलायती गोर्खा सैनिकनापंया भावनात्मक सम्बन्ध नं जोडेजुगु दु । फ्रान्सनापं धाःसा ७० दँया द्विपक्षीय सम्बन्ध दुगु खः । थ्वः विकसित मुलुकनापं नेपाःया राजनीतिक स्थिरता हासिल याँनिसें आः आर्थिक सहकार्यया सम्बन्धयात विस्तार यायेत भ्रमण फलदायी जुइगु खँनेदु । ‘समृद्ध नेपाः, सुखी नेपामिँ’ या राष्ट्रिय आकांक्षा नापं नीति व ज्याभ्वः, अथेहे बजेट प्रस्तुतिलिपा प्रधानमन्त्रीया थुगु विदेशयात्रा जईत्यंगु खः । थुकिं न्हाँपा प्रधानमन्त्री ओली भियतनाम व कम्बोडियाया भ्रमणय् झाँयादिगु खः ।
प्रधानमन्त्रीया भ्रमण आपसी सम्बन्धयात तीबः बित अथेहे नेपाः नं यागु उपलब्धिं उग राष्ट्रं ग्वाहालीया न्हुगु क्षेत्र, लगानी तथा व्यापार प्रवद्र्धन यायेगुलिं नेपाः नं थःगु प्रयासयात याकेगुलिं केन्द्रित जुइगु अपेक्षा यागु दु ।
प्रधानमन्त्री ओली अन्तरराष्ट्रिय श्रम सङ्गठन ९आइएलओ० या शतवार्षिकीया ज्याभ्वले जेनेभाय् आयोजना जुइगु विशेष समारोहय्् ब्वति कायेगु भ्वःलय् जेठ २६ व २७ गते स्विट्जरल्याण्डया जेनेभाय् झाँयादिँ । वय्कनं आइएलओया विशेष समारोहयात सम्बोधन यानादिगु ज्याभ्वः दु ।
शतवार्षिकी सम्मेलनय् ब्वति कायेगु नापं संयुक्त अधिराज्य व फ्रान्सया औपचारिक भ्रमण नेपाःया परराष्ट्र सम्बन्ध तथा अन्तरराष्ट्रिय मञ्चय् महत्वपूर्ण सहकार्यया े अवसर जुइगु भःलसा दु । जेनेभा बैठकय् हलिंया करिव ४५ देँया सरकार तथा राष्ट्रप्रमखया सहभागिता जुइगु दु । अन प्रधानमन्त्री ओलीया छुं देँया समकक्षीनापं व उच्चपदस्थ व्यक्तिनापं द्विपक्षीय भेटघाट जुइगु ज्याभ्वः दुगु परराष्ट्र मन्त्रालयं धागु दु ।
जेठ २७ निसें २९ गतेतक्कः बेलायतया औपचारिक भ्रमण यानादिम्हः वय्मनं अन च्वनादिगु भ्वःलय् जेठ २७ गते अक्सफोर्ड विश्वविद्यालयय् आयोजना जुइगु विशेष समारोहयात सम्बोधन याइगु जुगु दु । प्रधानमन्त्री ओलीं बेलायतया प्रधानमन्त्री थेरेसा मेनापं जेठ २८ गते द्विपक्षीय भेटवार्ता याइगु ज्याभ्वः दु । प्रधानमन्त्रीं भ्रमणया भ्वःलय् नर्वेली प्रधानमन्त्री इर्ना सोल्बेर्गनापं नं भेटवार्ता यायेगु दु ।
परराष्ट्रमन्त्री प्रदीपकुमार ज्ञवालीया कथं जेठ २९ निसें ३१ गतेतक्कः प्रधानमन्त्रीं फ्रान्सया भ्रमण याइगु व पेरिसय् वय्कनं थः फ्रान्सेली समकक्षी इदोवार्ड फिलिपनापं भेटवार्ता यानादिँगु धयादिल ।