लोकसेवाया विज्ञापन रद्द यायेत राज्य व्यवस्था समितिया निर्देशन

maitrinews

स्वनिगः । संसदया राज्य व्यवस्था समितिं स्थानीय तहया कर्मचारी माग यासें लोकसेवा आयोगं पिकागु विज्ञापन रद्द यायेत निर्देशन ब्युगु दु ।
समितिं संघीय मामिला तथा स्थानीय विकासमन्त्री लालबााबु पण्डितनापया खँलाबँला लिसें विज्ञापन रद्द यायेत निर्देशन ब्युगु खः ।
संघीय मामिला तथा सामान्य प्रशासनमन्त्री लालबाबु पण्डितं कर्मचारी भर्नाया नितिं लोकसेवा आयोगं यागु लिपांगु विज्ञापन ऐनअनुसार जुगु दावी यानादिँगु दु ।
थौं जुगु संसदया राज्य व्यवस्था तथा सुशासन समितिया बैठकय् मन्त्री पण्डितं कर्मचारी भर्नाया नितिं आयोगं यागु लिपांगु विज्ञापनप्रति विरोध जुईधुंका उगु जवाफ वःगु खः ।
आयोगं गुद्वः स्वयाँ अप्वः कर्मचारी भर्ना यायेत विज्ञापन यागु खः । उगु विज्ञापनं थुकिं न्हाँपाया समानुपातिक समावेशीया व्यवस्थायात उल्लंघन यागु धासें आलोचना जुयाच्वंगु खः ।
‘लोकसेवां पिकागु विज्ञापन संविधानया भावना विपतिर मजु । पुलांगु निजामति ऐनय् छु व्यवस्था दु, उगु हे कथं आयोगं विज्ञापन पिकागु खः,’ सोमबाः समितिया बैठकय् मन्त्री पण्डितं दावी यानादिँल ।
वय्कनं प्रदेश लोकसेवा आयोग मदनिगु कारणं संघीय लोकसेवा आयोगं कर्मचारी भर्नाया नितिं विज्ञापन यागु समेत धयादिँल ।
‘स्थानीय तहपाखें संकलन याना गथे खः अथे हे लोकसेवा आयोगयात छ्वयागु खः । संविधानं संघीय लोकसेवा आयोग व प्रदेश लोकसेवा अयोगया व्यवस्था यागु खः । स्थानीय तह व प्रदेशया स्थायी कर्मचारीया छनोट प्रदेश लोकसेवा अयोगं याइगु जुसां नं प्रदेश लोकसेवा आयोग मदुतले संघीय लोकसेवा आयोगं छनोट यानाबिगु व्यवस्था जुगु कथं हे विज्ञापन यागु खः,’ मन्त्री पण्डितं धयादिँल ।