आन्दोलन यायेगु देउवाया चेतावनी

maitrinews

स्वनिगः । काँग्रेस सभापति शेरबहादुर देउवां सरकारं हँगु विवादास्पद विधेयकविरुद्ध सशक्त आन्दोलन यायेगु चेतावनी बियादिँगु दु । वय्कलं सत्तापक्षं जवरजस्ती यासाः छुं हालतं नं पारित याके मबिँगु धासें सरकार हे प्रजातन्त्र मासेयाये त्यंगु आरोप बियादिँलः ।
बुधबाः प्रतिनिधि सभा बैठकया विशेष ईं ले न्वँवासें सभापति देउवां, गुठी बिधेयक, मिडिया काउन्सिल विधेयक, सुरक्षा परिषद विधेयक, मानवअधिकार विधेयक नापंया विधेयकं लोकतन्त्रयात कमजोर याइगु धयादिँलः ।
‘न्वँवायेगु, च्वय् दैंगु खँ प्रजातन्त्रय् महत्वपूर्ण खः । तर सरकारं उकिं नियन्त्रण याये त्यँना प्रजातन्त्रे हे आक्रमण याये त्यंगु दु । थ्वः छुं हालतय् नं पास याके बिँमखु,’ देउवां धयादिँलः, ‘सूचनाया हक कुष्ठित यागु दु । संविधाने हे सूचनाया हकया व्यवस्था जुगु दु । मानवअधिकार आयोगय् नियन्त्रण यायेगु प्रजातन्त्रे हे मेंगु आक्रमण खः ।’