राजधानीं राष्ट्रिय श्रम तथा रोजगार सम्मेलन

maitrinews

येँ । थःगु हे देँ रोजगारीे सिर्जना याना युवातयेत देँया आर्थिक, सामाजिक तथा भौतिक विकासय् हयेगु उद्देश्यं राष्ट्रिय श्रम तथा रोजगार सम्मेलन २०७६ शुरु यागु दु ।
श्रम, रोजगार तथा सामाजिक सुरक्षा मन्त्रालयया आयोजनाय् थौंनिसें राजधानीं शुरु जुगु उगु सम्मेलनया उलेज्याः प्रधानमन्त्री केपी शर्मा ओलीं यानादिँगु दु ।
आन्तरिक श्रमय् युवाया आकर्षण अप्वःकेगु, श्रम सम्बन्ध सुदृढ यायेगु, श्रम व रोजगारीया न्हुँगु व सिर्जनात्मक दृष्टिकोण उजागार याना थुगु क्षेत्रया विकासपाखें हे गतिशील अर्थतन्त्र निर्माण यासें देँया समृद्धिं तिबः बिगु उद्देश्यं उगु सम्मेलन आयोजना यागु खः ।
निन्हुँतक्कः जुइगु सम्मेलनय् श्रम तथा रोजगारया क्षेत्रय् सरकारं छ्यलेमागु कदम, निर्माण यायेमागु ऐन, कानून, नीतिलगायत विषयले छलफल जुई । श्रम, रोजगार क्षेत्रया चुनौति, रोजगारी तथा सीपया क्षेत्र म्हःसिकेगु विषयले नं छलफल जुइगु श्रम मन्त्रालयलं धागु दु ।
सम्मेलनया न्हाँपागु दिँ थौं श्रम तथा रोजगारसम्बन्धी नीति पुनरावलोकनया पक्ष, श्रम आप्रवासन व विदेशं लिहाावपिं युवाया हाकनं एकीकरण व ज्याया भविश्यया सम्बन्धय् थुगु क्षेत्रया जानकारं प्रस्तुत यायेगु कार्यपत्रय् सम्बन्धित विज्ञं टिप्पणी याइगु जुगु दु ।
सोमबाः नेपाली श्रम बजार व आय स्थितिया सिंहावलोकन, कार्य संस्कृति व श्रम मर्यादा, नेपाःलय् युवा उद्यमशीलता, रोजगारी व सूचना प्रविधि, श्रम उत्पादनशीलता, राष्ट्रिय अर्थतन्त्र व रोजगारीया नितिं सीप विकास विषयले सामूहिक छलफल जुई ।
सम्मेलनपाखें वःगु सुझावया आधारय् श्रम तथा रोजगार क्षेत्रय् मेमेंगु रणनीतिक ज्याभ्वः सञ्चालन यायेत ग्वाहाली जुइगु सरकारको विश्वास दु ।
सम्मेलनय् सरकारी निकाय, निजी क्षेत्र, थि थि ट्रेड युनियन, श्रम तथा रोजगार क्षेत्रया विज्ञ, विकासया साझेदार व गैरसरकारी संस्थाया प्रतिनिधिपिनिगु सहभागिता दु ।