लुम्बिनी क्षेत्रया उद्योग तत्काल बन्द यायेत सर्वोच्चया आदेश

maitrinews

स्वनिगः । सर्वोच्च अदालतं लुम्बिनी विकास कोष लिक्कःया १५ किलोमिटर क्षेत्र दुनेया सिमेन्ट कारखानानापं दक्वः उद्योग सञ्चालनय् रोक लगेयायेत अन्तरिम आदेश ब्युगु दु ।
बरिष्ठ अधिवक्ता प्रकाशमणि शर्मां दायर यागु रिटय् आइतबाः सुनुवाइ यासें सर्वोच्चया निम्हः न्यायाधीश तेजबहादुर केसी व मनोजकुमार शर्माया इजलासं सिमेन्ट कारखानानापंया उद्योग मेथाय् सारे यायेत धागु खः । आदेशय् प्रदूषण याइगु उद्योगतः बन्द यायेत सरकारयात निर्देशन ब्युगु खः ।
२०६६ सालय् औद्योगिक प्रवद्र्धन बोर्डं लुम्बिनी क्षेत्रया १५ किमि उखेंथुखेंया उद्योग खोले मयायेत निर्णय यागु खः । बोर्डया निर्णय विपरीत थि थि औद्योगिक घरानां उद्योग स्थापना यायेधुंका सरोकारवालापिनिसं उकिया विरुद्ध सर्वोच्चय् रिट दायर यागु खः ।