३३ किलो लुँया मुद्दाय् विराटनगर उच्च अदालतया न्यायाधीश सिंह बर्खास्त

maitrinews

विराटनगर । न्यायपरिषदं विराटनगर उच्च अदालतया न्यायाधीश उमेशकुमार सिंहयात बर्खास्त यागु दु ।
तस्करीया ३३ किलो लुँ व सनम शाक्य हत्या प्रकरणया अभियुक्तया निवेदनया सुनुवाइया भ्वःलय् पदीय आचरण कथं कर्तव्य निर्वाह मयागु धासें बर्खास्त यायेगु निर्णय जुगु परिषदया प्रवक्ता मानबहादुर कार्कीले जानकारी बियादिँलः ।
थुगु मुद्दाय् सुनुवाइ यानादिँम्हः विराटनगर उच्च अदालतया न्यायाधीश साधुराम सापकोटा व थीरबहादुर कार्कीयात धासाः निदँ बढुवा रोक्का यागु दु । इमितः गम्भीर रूपं सचेत यायेत नं न्यायपरिषदं निर्णय यागु दु ।
सोमबाः जुगु न्यायपरिषद बैठकं थुगु निर्णय यागु खः ।
परिषदं खुलाः बिक यागु अनुसन्धानलिपा कारबाहीया निर्णय यागु कार्कीं धयादिँलः ।
तस्करीया ३३ किलो लुँ व सनम शाक्य हत्या प्रकरणया अभियुक्तपिनित थुनाया पिनें च्वना मुद्दाया पुर्पक्ष जुईमा धासें ब्युगु निवेदनया पेशी तोकेयायेगु मुख्य न्यायाधीश कुलरत्न भूर्तेलनापं च्याम्हः न्यायाधीशयात परिषदं खुलाँनिसें छानविन यागु खः । सकसितं परिषदहे सरूवा याना छानविन यागु खः ।
न्यायाधीश ईश्वर खतिवडाया एकल समितिं प्रारम्भीक छानविन यमाम विस्तृत छानविन यायेत सुझाव बिइधुंका स्वम्हः न्यायाधीशया समिति दयेकुगु खः ।
न्यायाधीश विश्वम्भर श्रेष्ठ, केदार प्रसाद चालिसे व मिरा खड्काया समितिं विस्तृत छानविनलिपा ब्युगु प्रतिवेदनया आधारय् परिषदं मुख्य न्यायाधीश कुलरत्न भुर्तेलनापं स्वम्हःसिया ध्यानाकर्षण यायेगु निर्णय थुकिं न्हाँपा हे यागु खः ।
वय्क नापं न्यायाधीश जनक पाण्डे व सारङ्गा सुवेदीयात सामान्य ध्यानाकर्षण यागु परिषदं न्यायाधीश साधुराम सापकोटायात धासा छाय् सचेत मयायेगु धका न्यंगु खः ।
ज्यापाखें अलग यागु इलय् बीचेहे अवकाश कयादिँम्हः न्यायाधीश उमेश पौड्याल व नागेन्द्रलाल कर्णयात धासाः परिषदं सफाइ ब्युगु खः ।
सनम हत्या तथा तस्करीया ३३ किलो लुँकाण्ड सम्बन्धी मुद्दाय् जिल्ला अदालत मोरङं पुर्पक्षया नितिं धरौटी माग यागु व थुनाय् छ्वम्हः अभियुक्तयात न्यायाधीशपिसं धरौटी व तारेखय् तोतुगु धासें परिषदं छानबिन न्ह्याकुगु खः ।