राष्ट्र बैंकया न्हुँगु भवन शिलान्यास

maitrinews

स्वनिगः । राष्ट्रपति विद्यादेवी भण्डारीं नेपाल राष्ट्र बैंक केन्द्रीय कार्यालयया न्हुँगु भवनया शिलान्यास यानादिँगु दु ।
बालुवाटारस्थित राष्ट्र बैकय् थौं जुगु भवन शिलान्यास ज्याभ्वलय् राष्ट्रपति भण्डारीं देँया आर्थिक क्षेत्रया प्रवद्र्धन व नियमनया नापं अनुशासन कायम याना उच्च आर्थिक वृद्धि व स्थायित्वया नितिं केन्द्रीय बैंकया भूमिका प्रभावकारी जुइगु धयादिँलः । राष्ट्रवैंकया पुलांगु भवन २०७२ या विनाशकारी भूकम्पं दुंगु खः । वय्कलं आम नेपाःमिँया विश्वास व भरोसा दुगु बैंकं वइगु दिँ नं जारी याइगु मौद्रिक नीतिं ‘समृद्ध नेपाः, सुखी नेपाःमिँ’ या राष्ट्रिय सङ्कल्पयात साकार यायेत महत्वपूर्ण भूमिका निर्वाह यायेमागुलिं जोड बियादिँलः ।
“कृषि, उद्योग, जलस्रोत व पर्यटन थेंजागु क्षेत्रय् लगानी अप्वःयेका मुलुकया याकनं आर्थिक तथा सामाजिक रुपान्तरण यायेमा”, राष्ट्रपति भण्डारीं धयादिँलः, “ऐतिहासिक विरासत ज्वनाच्वंगु थुगु बैंक व भवन समग्र बैंकिङ प्रणालीइ अत्याधुनिक व मौलिक प्रतिबिम्ब जुई फयेमा ।”
अर्थमन्त्री डा युवराज खतिवडां मुलुक आः आर्थिक क्षेत्रया हे पुनःनिर्माणया चरणय् दुगु उल्लेख यासें सरकारं आर्थिक वृद्धिया नापं सामाजिक न्यायय् आधारित वितरणयात नं उलिहे प्राथमिकता ब्युगु धयादिँलः । लगानीया वातावरणया लागिं सरकारं ज्या यानाच्वंगु धासें वय्कलं मुलुकयात विद्युतीय व बंैकिङ कारोवारयुक्त दयेकेत अभियान सञ्चालन यागु धयादिँलः । अर्थमन्त्री डा खतिवडां वित्तीय स्थायित्वया चरणय् मुलुक थ्यंगुलिं मूल्यवृद्धि व व्यापार घाटा म्ह्वः यायेगु व लगानीया प्रतिफल हयेत बैंकं प्रभावकारी भूमिका म्हितिमागु धयादिँल ।
राष्ट्रिय पुनःनिर्माण प्राधिकरणया प्रमुख कार्यकारी निर्देशक सुशील ज्ञवालीं पुनःनिर्माणया लिपांगु ई गति कागु उल्लेख यासें नेपाःलं पुनःनिर्माणया क्षेत्र् प्राप्त यागु उपलब्धि व अनुभव भावी पुस्तायात हस्तान्तरण यायेमागुलिं जोड बियादिँलः ।