आइतबाःतक्क देँन्यंक वाः वइगु ,अधिकांश विमानस्थल बन्द

maitrinews

स्वनिगः । बिहीबाः चान्हेंनिसें देँन्यं वाः वयाच्वंगु दु । निरन्तर वाः वगु कारणं तराईया थि थि जिल्ला डुबेजुगु दु । पहाडया थाय्थासय् पहिरो वंगु दु । लँय् पहिरो वया म्हिगः चान्हेंनिसें बीपी राजमार्ग व मध्यपहाडी लोकमार्ग अवरुद्ध जुगु दु । गोलन्जोर व सुनकोशी गाउँपालिकाया बीपी राजमार्ग अवरुद्ध जुगु खः ।
म्हिगः चान्हें गोलन्जोर गाउँपालिका–५ या सोलाभञ्याङ व खनियाखर्कया दथुई लय् च्वय् नं पहिरो वया राजमार्ग अवरुद्ध जुगु जिल्ला प्रहरी कार्यालय सिन्धुलीया प्रहरी उपरीक्षक चक्रबहादुर सिंहं जानकारी बियादिँलः ।
अथेहे, सुनकोशी गाउँपालिका–१ कमरेय् नं पहिरोया कारणं बीपी राजमार्ग अवरुद्ध जुगु वय्कलं धयादिँलः । वय्कया कथं पहिरोया कारणं राजमार्ग अवरुद्ध जुया आः पहिरो चिकिगु ज्या जुयाच्वंगु दु ।
नापं च्वय् नं वगु पहिरोया कारणं गोलन्जोर गाउँपालिकाअन्तर्गत मध्यपहाडी लोकमार्ग नं अवरुद्ध जुगु खः ।
अवरुद्ध राजमार्ग चिँका सवारी आवागमन सञ्चालन यायेत गाउँपालिका नायः नापं समन्वय जुयाच्वंगु जिल्ला ट्राफिक प्रहरी कार्यालय सिन्धुलीया प्रमुख विष्णु बस्नेतं धागु दु । राजमार्ग अवरुद्ध जुया गन्तव्यय् वनाच्वंपिं यात्रु बीचेहे अलपत्र लागु दु ।
मद्धिक्क वाः वगु कारणं स्वनिगः पिनेया विमानस्थलया उडान प्रभावित जुगु दु ।
बिहीबाःनिसें मद्धिक्क वाः वगुच्वंगु कारणं अधिकांश विमानस्थल बन्द दु ।
त्रिभुवन विमानस्थलया प्रवक्ता प्रताप तिवारीया कथं लुक्ला, भोजपुर, तुम्लिङटार, फाल्पु, लामिडाँडा व धनगढी विमानस्थल बन्द जुगु दु । तवारीं भैरहवा, पोखरा, विराटनगर व भद्रपुर विमानस्थल धासाः वाः वयाच्वंसाः नं सुचारु जुयाच्वंगु धयादिँलः ।
जल तथा मौसम विज्ञान विभागया कथं शुक्रबाः न्हिछिँयंक वाः वई । मौसमविद् सुवास रिमालं देँन्यंकं मद्धिक्क वाः वइगु धयादिँलः । ‘शनिबाःतक्क हे वाः वई,’ वय्कलं‘सतर्क जुइमागु नं धयादिँल ः। नापं वय्कलं वाः नापं फय् नं वैगु जानकारी बियादिँलः ।
वाः वया खुसीँ लिक्कया वस्ती डुबेजुई फुगु धासें सरकारं सचेत जुइत इनाप यागु दु ।