थौं आषाढ शुक्ल पूर्णिमा, गुरुपूर्णिमा जक मखुसें धर्मचक्र प्रवर्तन दिवस नः

maitrinews

थौं अषाढ शुक्ल पूर्णिमा अर्थात् गुरु पूर्णिमा, थःत शिक्षा प्रदान यानादिँपिं गुरूप्रति श्रद्दा भाव प्रकटयाना मानेयायेगु खः । थौंया दिँ गुरुया रुपय् ज्ञानया पूजा याइगु खः । गुरुप्रति श्रद्दा व सम्मान प्रकट यासें थुगु दिँ देँ न्यंक गुरुपूर्णिमा मानेयाई । सनातन धर्मावलम्बिपिसं थौंया दिँयात थःगु धर्म तथा पारम्परीक सांस्कृतिक ज्ञानया लः क्यनादिँपिं गुरुप्रति आभार ब्यक्त यायेगु विशेष दिँया रुपमा कायेगु याई । अथेहे, बौद्धधर्मावलम्बिपिनिया नितिं थौंया दिँ धर्मचक्र प्रवर्तन दिवस खः ।

‘गु’ या अर्थ अन्धकार व ‘रु’ या अर्थ प्रकाश खः । अन्धकारं प्रकाशपाखें यंकिम्हः पात्रयात हे सम्मानपूर्वक गुरु धागु सनातन धर्मया मान्यता दु । मनुस्मृतिइ जन्म बिम्हः, संस्कार बिम्हः , मन्त्र बिम्हः वा वेद ब्वंकादिँम्हःसित गुरु धाई धका धयातगु दु । थः आचरणय् च्वना मेंपिन्त नं आचरणय् तयेफुम्हःसित स्मृतिइ गुरु धयातगु दु । व्यक्तिया न्हापाम्हः गुरु माँ व उकिंलिपाः बाः खः । व्रतबन्ध संस्कारया इले गायत्री मन्त्र बिम्हः व वेदादि शास्त्र ब्वंकादिँम्हःसित गुरु धाइगु खः ।

सनातन मान्यताकथं माँबाः व गुरुयात द्योया दर्जा बियातगु दु । गुरुयात माँबाया स्थान बियातगु दु । ज्ञान बिया व्यक्तिया जीवन परिवर्तन यानादिँपिं जुया माँबा स्वयाँ गुरुया स्थान च्वय् जुई धैगु सनातन धर्मया मान्यता दु । गुरु छन्हुँया लागिं जक मजुसें आः प्रचलनय् दुगु गुरुपूजा बर्खाया इलय् छथासं च्वनिपिं अर्वाचीन वैष्णव, शैव सन्यासीपिनिया परम्परां वगु खः । मंगलबाः हे पौराणिक ग्रन्थ रचनाकार महर्षि व्यासया जन्मजयन्ती खः ।

नापं बौद्धधर्मावलम्बिपिसं थौंया दिँयात धर्मचक्र प्रवतन दिवसया रुपय् काइगु खः । सिद्धार्थ गौतमं खुदँतक्कः दुष्कर चर्या याना बुद्धत्व लाभ यानाबिज्याय धुंका थौंया हे दिँ अर्थात् आषाढ पुर्णिमाया दिँ वारणसीं न्याम्हः थः शिक्ष्य भिक्षुपितं उपदेश बियाबिज्यासें धर्मचक्र प्रवर्तन सुरु यानाबिज्यागु खः । वसपालं उकिंयात ४५ वर्षतक्क निरन्तर रुपं गाँ गामें, नगरं नगरं परिक्रमा याना बहुजन हित व बहुजन सुखया लागिं समर्पित जुयाबिज्यासें अप्वः स्वया अप्वः व्यक्तिपिंत ज्ञानमार्गय् प्रतिष्ठित यायेत पथ प्रर्दशन यानाबिज्यागु खः । थुगु कारणं थौंया दिँ बौद्धधर्मावलम्बिपिनिया लागिं विशेष महत्व दु ।