नेपाल राष्ट्रबैंकं हल मौद्रिक नीति, आर्थिक वृद्धिया लक्ष्य लिँगु कुतः

maitrinews

स्वनिगः । नेपाल राष्ट्र बैंकं आर्थिक वर्ष २०७६–०७७ या बजेट तथा ज्याभ्वः एवं नेपाल सरकारया १५ औँ योजनानापं सामञ्जस्ता कायम याना देँया आर्थिक वृद्धिं ग्वाहाली यायेगु मौद्रिक नीति सार्वजनिक यागु दु ।
चालु आर्थिक वर्षया नितिं थौं जारी जुगु उगु नीतिं आर्थिक तथा वित्तीय स्थायित्व हासिल यायेगु, वित्तीय पहुँच अप्वकेगु, वित्तीय सेवा प्रवाहय् प्रादेशिक सन्तुलन कायम यासें बजेटं निर्धारण यागु आर्थिक वृद्धिया लक्ष्य लिँगु कुतः यागु दु ।
मुद्रास्फीतिं खनेदुगु दबाब तथा शोधनान्तर घाटाय् दुगु वित्तीय क्षेत्रया सवलीकरणपाखें कर्जाया विवेकशील उपयोगयात प्रोत्साहन यायेगु कुतः उगु नीतिं यागु दु ।
नेपाः उत्साहजनक कथं आर्थिक वृद्धिया लँय् न्ह्याना च्वंगु धासें केन्द्रीय बैंकया गभर्नर चिरञ्जीवी नेपालं आन्तरिक क्रियाकलाप विस्तार जुगुनापं उदियमान छिमेकी अर्थतन्त्रहरुया विकासया लाभ कायेगु अवसर प्राप्त जुगु वास्तविकता न्यंकादिँलः ।
उगु नीति प्रस्तुत यासें वय्कलं आर्थिक वृद्धिया प्रवृत्तियात ग्वाहाली याना समष्टिगत आर्थिक स्थायित्व कायम यायेगु चुनौतीपूर्ण जुगु स्वीकार यानादिँलः । वय्कलं अन्तरराष्ट्रिय आर्थिक परिदृष्य, आर्थिक स्थितिया समीक्षा, धितोपत्र बजार, न्हापांगु मौद्रिक नीतिया समीक्षा, मौद्रिक व्यवस्थापन, कर्जा ज्याभ्वःया समीक्षा, वित्तीय क्षेत्रया ज्याभ्वः, वित्तीय पहुँच, आर्थिक तथा मौद्रिक नीतिया लक्ष्य, सञ्चालन तथा उपकरण, कर्जा तथा स्रोत व्यवस्थापन, वित्तीय क्षेत्र सुदृढीकरण, नियमन, लघुवित्तसम्बन्धी नियमन, भुक्तानी प्रणाली, सुदृढीकरण व विदेशी विनिमय व्यवस्थापनय् केन्द्रित जुया १४८ बुँदे उगु नीति प्रस्तुत यानादिँगु खः ।