रक्सौल–काठमाडौँ रेलमार्गः ४५ किलोमिटर सुरुङ दयेकेगु

maitrinews

स्वनिगः । प्रस्तावित रक्सौल–काठमाडौँ रेलमार्गया ४५ किलोमिटर सुरुङमार्ग प्रस्ताव यागु दु । रेलमार्ग निर्माणया लागिं तयार यागु प्रारम्भिक प्रतिवेदनय् ४५ किलोमिटर सुरुङमार्ग प्रस्ताव यागु रेल विभागं धायु दु ।
भारतया कोंकण रेलवे कर्पोरेसन लिमिटेड (केआरसीएल) नं तयार यागु प्रारम्भिक प्रतिवेदन परराष्ट्र मन्त्रालय जुया भौतिक पूर्वाधार तथा यातायात मन्त्रालयय् वगु दु । उगु प्रतिवेदनय् रेल मार्गको कुल लम्बाइ १३५ किलोमिटर दुगु प्रस्ताव यागु खः । “उगु रेलमार्गय् ४५ किलोमिटर सुरुङमार्ग प्रस्ताव यागु दु”, रेल विभागया प्रवक्ता अमन चित्रकारं धयादिल ।
अथेहे, स्विँन्यापु ताँ निर्माणया समेत प्रस्ताव यागु दु । उगु रेलमार्गया लागिं नेपाल सरकारया समन्वयय् कोंकण रेलवे कर्पोरेसन लिमिटेडं करिब दच्छिँ बिकाः प्रतिवेदन तयार यागु खः ।
प्रवक्ता चित्रकारया कथं वीरगन्जस्थित सुक्खा बन्दरगाहनिसें येँया चोभाःरय् प्रस्तावित सुक्खा बन्दरगाहतक्क कुल १३५ किलोमिटर प्रस्ताव यागु खः । उगु अन्तरदेशीय रेलमार्ग ब्रोडगेज ढाँचाय् निर्माण यायेगु याना प्रस्ताव प्रतिवेदनय् उल्लेख दु । थुकिंन्हापा भारतं १९० व १३५ किलोमिटर दूरी जुइगु याना उगु रेलमार्ग निर्माणया प्रस्ताव नेपालसमक्ष तगु खः ।
प्रस्तावित उगु रेलमार्ग निर्माण प्रक्रियायात न्ह्याकेत न्हापांगु दँया भदौ १५ गते नेपाः व भारतया दथुईएक समझदारीपत्रय् हस्ताक्षर जुगु खः । प्रधानमन्त्री केपी शर्मा ओली व भारतीय प्रधानमन्त्री नरेन्द्र मोदीया उपस्थितिं नेपाःयापाखें भौतिक पूर्वाधार तथा यातायात मन्त्रालयया तत्कालीन सचिव मधुसूदन अधिकारी व नेपाःया लागिं भारतीय राजदूत मञ्जीवसिंह पुरीं उगु समझदारीपत्रय् हस्ताक्षर यानादिगु खः ।
अथेहे, उगु रेलमार्ग निर्माणया लागिं नेपाः व भारतया दथुई रेलमार्गया विस्तृत परियोजना प्रतिवेदन (डीपीआर) तयार यायेगुबारें समेत सहमति जुईधुंकुगु दु ।
समझदारीपत्रय् हस्ताक्षर जुई न्ह्यो हे भारतं थुगु रेलमार्गया प्रारम्भिक सम्भाव्यता अध्ययनया लागिं फिल्ड वर्क सिधयेधुंकुगु दु । भारतीय रेल्वे प्राविधिकं २०७५ जेठ २५ निसें प्रारम्भिक सम्भाव्यता अध्ययन सुरु यागु खः । अध्ययनया लागिं भारतीय रेल्वेया परामर्शदाता नेपाः वया ज्या यानादिँगु खः ।
प्रतिवेदनकथं प्रस्तावित उगु रेलमार्ग वीरगन्जया सुक्खा बन्दरगाहपाखें बाराया जितपुर–डुमरवाना थ्यनाः अनं प्रस्तावित निजगढ विमानस्थल जुया निर्माणाधीन निजगढ–काठमाडौँ द्रुतमार्गया समानान्तर जुसें येँया चोभाःतक्क थ्यनिगु खः ।
‘जिरो प्वाइन्ट’ चोभाः
रेल विभागया महानिर्देशक बलराम मिश्रया कथं प्रतिवेदनय् उगु रेलमार्गया ‘जिरो प्वान्ट’ येँया चोभाःयात तोेकेयागु दु । थुकिंया दथुई निगु थासय् रेलमार्गं द्रुतमार्गयात क्रस याइगु नं प्रतिवेदनय् उल्लेख दु । रक्सौलनिसें चोभाःतक्क झिन्निगु स्टेसन प्रस्ताव यागु दु ।