११ बुदें घोषण पत्र जारी यासें उद्यमशीलता सम्मेलन क्वचाल

maitrinews

स्वनिगः । देँया अर्थतन्त्र बलाकेत सरकारं युवा उद्यमशीलताय् लगानी अप्वःकेमागु निकर्षनापं निन्हुँया नेपाल युवा उद्यमशीलता सम्मेलन २०१९ क्वचागु दु ।
४३ जिल्लाया ५०० युवा प्रतिनिधिपिसं उठेयागु मागयात समेटेयाना ११ बुदें घोषणा पत्र जारी यागु खः । उद्यम याये न्ह्यापिं युवायात सरकारं पहिचान याना निसर्त लगानी यायेमागु, आइडिया बैंक स्थापना यायेमागु, बिनाधितो लोन व ब्याज अनुदानया झन्झट जुगु प्रक्रिया अन्त्य यायेमागु, सरकारं युवा उद्यमशीलताया विकासया लागिं सञ्चालन यागु ज्याभ्वःत छगुद्धार प्रणालीपाखें जुइमागु व सेवा, सुविधा व अनुदानया ज्याभ्व पारदर्शी जुइमागु सम्मेलनं निष्कर्ष लिकागु दु ।
प्रदेश ३ सरकारया उद्योग, पर्यटन, बन तथा वातावरण मन्त्रालय व विशाल मिडिया ग्रुपया आयोजना तथा आईएमई फाउण्डेसनया सह आयोजना दुगु सम्मेलनपाखें प्राप्त उपलब्धीबारे समापन सत्रय् न्वगवासें सम्मेलन मुल आयोजक समितिया संयोजक विशाल गैरें उद्यम याये न्ह्यापिं युवापिनिगु बिजनेश प्लानय् सरकार व निजि क्षेत्र लगानी यायेत तयार जुगलिं युवापिंके उत्साह थपेजुगु व वइगु दिनय् न्हुगु स्टाटप कम्पनी खोलेयायेत थुकिं ग्वाहाली याइगु धयादिँल । समापन सत्रय् संघीय सरकारया कृषि तथा पशुपंक्षी विकासमन्त्री चक्रपाणी खनाल बलदेवं बिगतया कमिकमजोरी व गलत प्रबृतिया कारणं युवा बिदेश पलान जुइमागु चर्चा यासें निगु तिहाई प्राप्त थुगु सरकारं ब्यवस्थीति योजनाया नापं युवाया आइडियाय् लगानी यायेगु प्रतिवद्धता ब्यक्त यानादिँल । समापन सत्रय् नेपाल उद्योग बाणीज्य महासंघया न्वकू एवं आईएमई गु्रपया नायः चन्द्र ढकालं युवाया न्हुगु सोचय् लगानी अप्वःकेगु व सरकारं उद्यम याये न्ह्यापिं युवायात सहजिकरण यायेमागुलिं जोड बियादिल । वय्कलं उद्यमी जुइत सहज मजुगु उल्लेख यासें तःतधंगु चुनौतीया सामना याये फुपिं युवा नक सफल उधमी जुइगु धयादिँल । सम्मेलनय् पुर्व प्रधानमन्त्री माधव कुमार नेपाल, अर्थमन्त्री डा. युवराज खतिवडा, सञ्चार तथा सुचना प्रविधिमन्त्री गोकुल बास्कोटा, योजना आयोगया न्वकू डा. पुष्प कडेँल, पुर्व अर्थमन्त्री सुरेन्द्र पाण्डे, संकरप्रसाद कोइराला, प्रदेश ३ उधोगमन्त्री अरुण नेपाल, पुर्व उद्योगमन्त्री महेश बस्नेत, उद्योग सचिव यमकुमारी खतिवडा, बरिष्ठ उद्यमी हरीभक्त सर्मा, चन्द्र ढकाल, युवा उद्यमी हेमराज ढकाल, लक्ष्मण के.सी, दिलिप अग्रवाल, बैंकर अनिलकेशरी शाह, अनुपमा खुन्जेली, प्रविन बस्नेतलगायत ४० स्वयाँ अप्वः स्पीकरं थःगु प्रस्तुती बियादिगु खः । सम्मेलनय् उद्यम याये न्ह्यापिं युवातयेत लक्षित याना विशाल फाउन्डेशनं प्रकाशन यागु युवा उद्यमशीलता सफूया बिमोचन समेत यागु खः ।