ललिता निवासया फुक्क मोही नक्कली

maitrinews

स्वनिगः । बालुवाटारया ललिता निवासस्थित जग्गाय् खडा यागु अप्वः मोही ‘शंकास्पद’ खनेदुगु दु । अख्तियार दुरुपयोग अनुसन्धान आयोगं आःतक्कया अनुसन्धानं २०२१ साललिपाया मोहीत नक्कली जुगु निष्कर्ष लिकागु खः ।
ललिता निवासबारे छानबिन यागु पूर्वसचिव शारदाप्रसाद त्रिताल संयोजकत्वया समितिं समेत अथेहे निष्कर्ष लिकागु खः ।
तत्कालीन राजा महेन्द्रं जननिर्वा्चित सरकार ढालेयायेगु व प्रजातान्त्रिक आन्दोलनय् लगेजुपिं नेतापिनिगु सम्पत्ति समेत जफत याइगु सूचँ सिया सुवर्णशमशेरं बालुवाटारया जग्गा श्रीमतीनापं थ्ः सन्तानयात ब्युगु खः । सुवर्णशमशेरं २०१७ असार ३० गते ५७ रोपनीया दरं श्रीमती श्वेतप्रभासहित काय् व भौ याना न्याम्हःसित सम्पत्ति बकसपत्र यानाब्युगु खः । बाँकी दुगु १४ रोपनी ११ आना जग्गा जक थःगु नाकय् तगु खः । गृह मन्त्रालय स्रोतया कथं सरकारं जफत यागु जग्गा १४ रोपनी ११ आना जक खनेदु ।
सुवर्णशमशेरं सम्पत्ति भागबन्डा यागु न्यालाःलिपा तत्कालीन राजा महेन्द्रं शासन सत्ता थःगु ल्हातय् कागु खः । पञ्चायती व्यवस्थाया विरोध यापिंत विशेष परिस्थिति ऐन हया पक्राउ याग नापं इमिगु सम्पत्ति रोक्का व जफत यागु खः । लिपा व्यक्तिया सम्पत्ति जफत याये मजिउ धैगु आवाज वसेंलिं वय्कलं २०१९ सालय् व्यक्तिया जग्गा राज्यं काय् फुगु व्यवस्था दुगु जग्गा प्राप्ति ऐन हल ।
निदँया दुनेहे मोहीया जग्गाय् स्वामित्व जुइगु याना भूमिसम्बन्धी ऐनसमेत जारी जुल । मोहीया हक सिर्जना जुइगु भूमिसम्बन्धी ऐन जारी छुं दिँ लिपाहेँ जग्गा प्राप्ति ऐनकथं ललिता निवासया दक्व जग्गा अधिग्रहण जुइगु सूचँ वल । उगु इलय् आधिकारिक रूपं मोही दर्ता यायेगु सम्भव मजुगु जानकारपिंस धागु दु ।