पेट्रोलियम पाइपलाइनया थौं उलेज्या

maitrinews

मोतिहारी–अमलेखगन्ज पेट्रोलियम पाइपलाइनया थौं उलेज्या जुगु दु ।
दक्षिण एसियायाहे न्हापांगु क्रस बोर्डर पेट्रोलियम पाइपलाइनया रूपय् च्वंगु थुगु पाइपलाइनया उलेज्या प्रधानमन्त्री केपी शर्मा ओली व भारतीय समकक्षी नरेन्द्र मोदीं मंका रूपं यानादिगु खः ।
थौं प्रधानमन्त्री तथा मन्त्रिपरिषद्या ज्याकुथिं प्रधानमन्त्री ओलीं व भारतीय समकक्षी मोदीं नयाँ दिल्लीस्थित हैदराबाद भवनं छकोलं पेट्रोलियम पाइपलाइन उलेज्या यानादिगु खः । थुगु आयोजना नेपाःया राष्ट्रिय गौरवया आयोजनाया रुपं स्वगु दु ।
रिमोटया सेन्सर जुया कम्प्युटरया सेन्सरपाखें अमलेखगन्जस्थित डिपोया युनिटया भल्व चाइगु व उकिंलिपा पाइपलाइनमपाखें नियमित रूपं चिकँ आपूर्ति सुरु जुइगु व्यवस्था मिलेयागु दु । थुकिंन्हापा हे पाइपलाइनया सफल परीक्षण जुईधुंकुगु दु ।
उलेज्यानापं लिपांगु डेढ दशकनिसें चर्चाय् दुगु मोतिहारी–अमलेखगन्ज पेट्रोलियम पाइपलाइनं पूर्णता कागु दु ।
नेपाः व भारतदथुईया मित्रताया प्रतीकया रूपय् समेत जुगु पाइपलाइनया सुरक्षाया जिम्मेवारी नेपाली सेनायात ब्युगु दु । पाइपलाइनया नेपाःपाखेंया ३७.५ किलोमिटरया सुरक्षाया जिम्मेवारी नेपाली सेनां कागु खः ।
देँयाहे अन्तरदेशीय पेट्रोलियम पाइपलाइन सञ्चालनय् वगुनापं वार्षिक करिब ५० करोड रुपियाँ ढुवानी खर्च बचत जुइगु नेपाल आयल निगमं धागु दु । अथेहे, नेपाल आयल निगमं थौं बहनिनिसें लागु जुइगु याना पेट्रोल डिजेल व मट्टीतेलया साविक मूल्यय् नितकाः म्ह्वः जुगु दु । न्हुगु मूः लागू जुगुनापं पेट्रोलया १०७ व डिजेल तथा पेट्रोलया मूः ९५ य् क्वहाँ वगु दु ।