मेँ प्वाःखनिम्हः मलुसेलिं जात्रा मन्ह्यात

maitrinews

स्वनिगः । लिपांगु दँ भाद्र शुक्लपक्ष पून्हिँया दिँ बहनि ८ बजे मध्यपुरथिमि नगरपालिका दिगु भैरवया मण्डलय् मध्यपुरथिमि–५ चोडेया ४० वर्षदुम्हः बालकराम श्रेष्ठं में प्वाःखंगु खः ।
२०६३ सालनिसें मन्ह्यागु थुगु जात्रां लिपांगु दँ पुनर्जीवन कायेधुंका आः हरेक वर्ष मद्धिक्क जात्रा न्ह्याइ धैगु भलसा थुगु वर्ष हाकनं पायछि मजुल । मेँ प्वाःखनिम्हः तयार मलुसेलि थुगु वर्ष हाकनं जात्रा मन्ह्यात । मेँ प्वाःखनिम्हः व्यक्ति मध्यपुरथिमिया श्रेष्ठ थरया हे जुईमागु प्रचलनकथं चेंया पुन्हिया मेय प्वाः खनेगु जात्रा व्यव्स्थापन समितिया संयोजनय् जात्रा न्ह्याइगु समितिं समेत थुगु वर्ष मेम्हः व्यक्ति तयार याये मफुसेलिं जात्रा मन्ह्यागु खः ।
२५ वर्ष न्ह्योनिसें बन्द जुया लोप जुइगु अवस्थाय् थ्यंगु थुगु जात्रा कृष्ण नानीचा श्रेष्ठं २०५२, २०५७ व २०६३ सालय् याना १० वर्षय् स्वक्वः मेँ प्वाःखंगु खः । उकिंलिपा लिपांगु वर्ष स्थानीय युवां समिति हे दयेका जात्रा जोगेयायेगु अभियान न्ह्याकुसाः २०७४ सालय् बालकुमारीया २९ वर्ष दुम्हः वीरेन्द्रभक्त गजु श्रेष्ठं व २०७५ सालय् थिमि–५ चोडेया ४० वर्ष दुम्हः बालकराम श्रेष्ठं मेँ प्वाःखःगु खः । मध्यपुरथिमि नगरपालिकाया ३५०००० ग्वाहाली व मगागु रकम स्थानीयवासी चन्दादातापाखें सङ्कलन याना लिपांगु वर्ष सञ्चालन जुगु थ्वः जात्रा थुगु वर्षनिसें धासाः हाकनं अनिश्चित जुगु दु ।