कृष्णनगरया तनाव साम्य, मूर्ति विसर्जन, शव यंकल

maitrinews

बुटवल । लक्ष्मीपूजाया मूर्ति बिसर्जनया भ्वलय् विवाद जुया कपिलवस्तुया कृष्णनगरय् उत्पन्न जुगु तनाव साम्य जुगु दु । थौं हे कर्फ्यु हटेयाइगु संकेत स्थानीय प्रशासनं ब्युगु दु ।
बिहीबाः चान्हें स्थानीय, सम्बन्धित पक्ष, कपिलवस्तु जिल्ला प्रशासन व सुरक्षा निकायया प्रदेश प्रमुखनापंया सर्वपक्षीय वार्तापाखें लक्ष्मी पूजाया मूर्ति बिसर्जन यायेगु व प्रहरीया गोलीं सिंपिनिगु शव उठेयायेगु सहमति जुगु दु ।
वार्तालिपाः प्रहरीया ग्वाहालिं लक्ष्मीपूजाया मूर्ति बिसर्जन यागु व मृतकया थःथितिं शव पोष्टमार्टमया लागिं जिल्ला अस्पताल तौलिहवा यंकुगु कपिलवस्तुया प्रहरी प्रमुख प्रहरी उपरीक्षक दीप शमशेर जबरां धयादिल । ‘चान्हें लिबाक जक सम्बन्धित पक्ष वार्ताय् झाँयादिल व सुथय् ३ बजेतक्कया वार्तालिपा सहमतिं थ्यन ,’ वय्कलं धयादिल, ‘मृतकयात क्षतिपूर्ति लगायतया मागत दु, छुं जिल्लास्तरं व छुं केन्द्रं सम्बोधन यायेमागु दु, दकले महत्वपूर्ण कृष्णनगरय् साम्प्रदायिक सदभाव कायम यायेगु खँय् निगुं पक्ष एकमत जुल ।’
यद्यपि बिहीबाः सुथय्निसें लगेजुगु कर्फ्यु धासाः हटेयागु मदु । बिहीबाः मध्यान्ह कृष्णनगर भन्सार कार्यालयनिसें ७०० मिटर उत्तर, पश्चिमपाखें ७०० मिटर व पूर्वपाखें ३०० मिटरया क्षेत्रय् लगेयागु कर्फ्यू मेंगु आदेश मजुतक्कया लागिं जारी जुगु कपिलबस्तुया प्रमुख जिल्ला अधिकारी गजेन्द्र बहादुर श्रेष्ठं धयादिल । शुक्रबाः मध्यान्हतक्क कर्फ्यु नं हटेजुईगु श्रेष्ठं धयादिल ।