यलय् ४०० दँ पुँलांगु कात्तिक प्याखँ

maitrinews

यल । पाटन दरबार परिसरय् करिब ४०० दँ पुलांगु कात्तिक प्याखँ जुयाच्वंगु दु । देँ व जनताया भलो जुइगु विश्वास नापं थुगु प्याखँ हुइकिगु कात्तिक नाच संरक्षण समितिं जानकारी ब्युगु दु । प्याखँले करिब सच्छिम्हः कलाकार सहभागी दु । प्याखँ बहनि ७ बजेनिसें चान्हेंतक्क केनी । लिपांगु शुक्रबाः सुरु जुगु प्याखँ झिन्निन्हुँतक्क जुई ।
कात्तिक प्याखँ सञ्चालन समितिया दुजः सञ्जय शर्मा राजोपाध्यायया कथं प्याखँले कृष्णलीलाया माध्यमं समाजय् व्याप्त विकृति विसंगतियात न्ह्ब्वया सचेत याई । ‘सिद्धिनरसिंह मल्लया गुरुपिं हरिवंश राजोपाध्याय व विश्वनाथ राजोपाध्यायं १६९७ य् थुगु प्याखँ सुरु यागु विश्वास दु । कात्तिक विष्णुया महिनाया रूपं काइगु खः । सिद्धिनरसिंह विष्णुया भक्त खः । उकिं देँ व जनताया भलो जुइगु विश्वासया नापं कात्तिक महिनाय् प्याखँ हुइगु परम्परा दु ।’
सुरुइ न्यान्हुँ हुइकिगु प्याखँ योगनरेन्द्र मल्लया पालाय् २७ दिँतक्क जुगु खः । वि।सं। २००६ निसें ०३७ तक्क कात्तिक प्याखँ निन्हुँ जक जुइगु खः । तत्कालीन राजनीतिक परस्थितिया कारणं प्याखँ निन्हुँई सिमित यागु कात्तिक नाच संरक्षण समितिया नायः किरण चित्रकारं धयादिल । ०३८ निसें १० दिँतक्क प्याखँ सञ्चालन यागु खः । ०७१ निसें धासाः १२ दिँतक्क प्याखँ सञ्चालन जुयावगु खः ।