पूर्वसभामुख महराया मुद्दा लच्छिँया दुने फैसला जुइगु

maitrinews

स्वनिगः । बलात्कार कुतया अभियोगय् थुनाय् दुम्हः पूर्वसभामुख कृष्णबहादुर महराया मुद्दा लच्छिँया दुने फैसला जुइगु जुगु दु । उच्च अदालत यलं लच्छिँया दुने उगु मुद्दा क्वचायेकेत जिल्ला अदालतया नामय् बिहीबाः आदेश ब्युगु दु ।
थुनापिने च्वना मुद्दा ल्वाय् दयेमागु धासें महरां उच्च अदालतय् ब्युगु माग धासाः अदालतं अस्वीकार यागु दु । महरां पुनरावेदन निवेदनय् सुनुवाइ यासें उच्च अदालतया मुख्य न्यायाधीश नहकुल सुवेदी व टेक नारायण कुँवरया इजलासं बिहीबाः महराविरुद्ध माक्वः प्रमाण दुगु कारणं पुर्पक्षया लागिं थुनाय् तयेगु जिल्ला अदालतया हे आदेश सदर यागु खः । तर, मुद्दाया फैसला धासाः याकनं यायेत आदेश व्युगु दु ।
आदेशय् धागु दु, ‘प्रस्तुत मुद्दा मुलुकी फौजदारी कार्य्विधि नियमावली २०७५ या नियम बमोजिम लगातार कारबाही व सुनुवाइ यायेमागु प्रकृतिया जुगु व पीडितया बकपत्रसमेत जुइधुंकुगु खँना मेपिं साक्षी बुझेयायेगु लगायत प्रमाण बुझेयायेगु ज्या क्वचायेका मुलुकी कार्य्विधि संहिता २०७४ या दफा १३१ बमोजिम लच्छिँया दुने प्रस्तुत मुद्दाया कारबाही व किनारा यानादिसँ ।’ अदालतं पीडितया बकपत्र याना साक्षीतयेगु बकपत्र यानाच्वंगु दु ।
उच्च अदालतया आदेश कथं आः जिल्ला अदालतं लच्छिँया दुने मुद्दाया फैसला यायेमागु जुई । पीडित मिसां महरायात तोतकेगु धासें उच्च अदालतय् निवेदनसमेत ब्युगु दु । थःत धम्केयाना महराविरुद्ध जाहेरी वबइकुगु वय्कया धापु खः । तर, अदालतं अनुसन्धानया प्रमाणयात हे आधार मानेयाना आदेश ब्युगु दु ।