धार्मिक जीवनया सार्थकता त्यागय् दुः बुद्ध

maitrinews

भगवान बुद्धं श्रावस्तीया जेतवनय् थःगु जीवनया २५ वर्ष तक्कया वर्षावास च्वनाबिज्यागु दु । उगु विहार अनाथपिण्डीक नामक छम्हः महाजनं दयेका ब्युगु खः । छगु समय जब बुद्ध राजर्गहया वेलुवनय् च्वनाबिज्यात तव वसपोलं हरेक दिँ उपदेश बिया बिज्यासें ध्यान भावना स्यनाबिज्याइगु खः । उगु इलय् श्रावस्तीया छम्हः व्यापारी अनाथपिण्डीक व्यापारया हे लागिं राजगृह वगु जुयाच्वन । अनाथपिण्डीक दानी व दयालु व्यक्ति जुयाच्वन । अनाथपिंत पीण्ड अर्थात् भोजन बिम्हः व्यक्ति खः । उकिं अनाथपिण्डीक नामं प्रचलित जुल । राजगृहमा च्वना च्वंगु इलय् अनाथपिण्डीकया नं बुद्धपाखें धर्म उपदेश न्यनेगु इच्छा जुल । उकिं अनाथपिण्डीक छन्हुँ वेलुवन विहारय् वन । अनाथपिण्डीकयात अनया शान्त वातावरणय् बुद्धया प्रवचन न्यनेगु मौका प्राप्त जुल ।
उगु इलय् तथागत बुद्ध धयाबिज्यात, संसारय् दुगु कोलाहल व वैचेनी फुक्कं दुखः खः । न्ह्यागु हे दुःख छाय् मजुइमा उकिं विमुख जुइत अन्तर मनयात शान्त यायेमा । धन सम्पत्ति, मान मर्यादा, पद प्रतिष्ठा प्राप्त याना व्यक्ति सम्पन्न जुईफु तर सुखी जुई फैमखु । अन्तर यात्रा अर्थात् ध्यान भावनां जक दीर्घकालीन सुख प्राप्त यायेफै । जीवनय् न्हापांगु पटक थजागु धर्म उपदेश न्यनेगु मौका प्राप्त याम्हः अनाथपिण्डीक बुद्धया प्रवचन न्यना प्रभावित जुल । प्रवचन न्यनेधुंका अनाथपिण्डीकं बुद्धयात निवेदन यात, भगवान शास्ता जित थःगु मनय् च्वंगु दुःख प्वंके मास्तेवल । छपिंस जित मार्ग निर्देशन बियाबिज्याहुँ । जिगु तःधंगु व्यापार दु, जितः सेवा याइपिं सेवकत नं यक्वः दु । जिके प्रशस्त धन सम्पत्ति नं दु तर नि सुखी मजु, जिगु मन शान्त मजु । अनेक किसिमया चिन्तां सतेयाना च्वनी । जिं अजिगु दक्वः व्यापार तोताछोय् वा छेँ हे तोतावने , छुं यासाः जिं शान्ती प्राप्त यायेफै, जित लँ क्येना बिज्याहुँ ।
अनाथपिण्डीकया खँ न्यना बुद्धं धयाबिज्यात, यदि व्यक्ति सही मार्गपाखें वन धासाः धार्मिक जीवनया सुख सकसिनं प्राप्त यायेफु । सु व्यक्ति यदि धन सम्पत्ति हे सम्पूर्ण सुख खः धका लिप्त जुया च्वनी वा धन सम्पत्ति प्राप्त यायेत जक थःगु जीवन बितेयाई, सुयागु उपकार याईमखु, धनया सही सदुपयोग याइमखु धासाः उम्हः व्यक्तिं जीवन व्यर्थय् खेर छ्वयाच्वनी । तर सु व्यक्ति धन सम्पत्तिं जक केन्द्रीत मजुसें थःगु धनया सही उपयोग याई उम्हः व्यक्तिया धन सार्थक जुई । थथे जुसाः धन सम्पति आर्जन यायेगु पाखें विमुख जुईमागु छुं कारण मदु । बुद्धया मार्गनिर्देशनं अनाथपिण्डीकयाके श्रद्धा भाव जागृत जुल ।
बुद्धं धयाबिज्यात, धन स्वयम अपवित्र मखु तर उकिप्रतिया आशक्तिं मनू दास जुई । धन प्राप्त यायेगु जक जीवनया उद्धेश्य जुई मज्यु । शलि, समाधि व प्रज्ञाया लागिं नं झीगु जीवन अग्रसर जुईमा । थ्वहे उद्धेश्यं धार्मिक जीवनपाखे अग्रसर याई । बुद्धं थःगु धापू प्रष्ट यासें हाकनं धयाबिज्यात, मनूतयेसं थःगु रुची व कौशल अनुरुप न्ह्यागु ज्या यासाः जिउ , छुं नं ज्या चिधँ, तःधँ जुइमखु । अप्रमादपूर्वक थःगु ज्या यायेगु हे महत्वपूर्ण खः ।
वसपोलं त्याग चेतना सम्बन्धय् उपदेश ब्युसें धयाबिज्यात, दान बिइगु, त्यागी जुइगु धैगु धार्मिक जुइगु मखु । करकाप वा मेंपिन्त क्यनेया लागिं दान ब्युसाः मनय् क्लेश भावना उत्पन्न जुई । उकिं मन शान्त जुएमखु । मैत्री व करुणा युक्त मनं ब्युगु दानं मन आनन्दीत जुई । शुद्ध मनं दान बिइगु धैगु सिमा पिइगु थे खँ, गुकिं गर्मीयामय् शीतलता प्रदान याई । व नयेत साँगु फल नं बिई ।
तथागत बुद्धया उपदेश न्येना अनाथपिण्डीक खुसीं गद्गद् जुल । अनाथपिण्डीकं धाल, भगवान शास्ता जिं थःगु नगरय् भिक्षुसंघया लागिं विहार दयेका दान बिइगु इच्छा जुल । कृपया जिगु दान दान स्वीकार याना जित धार्मिक जीवनयावन यायेमा मौका बियाबिज्याहु । बुद्धं नं अनाथपिण्डीकया दान स्वीकार यानाबिज्यात । अनलिं अनाथपिण्डीकं भिक्षुसंघया लागिं जेतवन नामक विहार दयेका दान बिल । व, थ्वहे दाननापं अनाथपिण्डीकं धार्मिक जीवनय् न्ह्यावना शान्तमय जीवन व्यतीत यासें थःगु जीवन सार्थक यात ।