सरस्वतीया पूजा याना विद्या प्रारम्भ यासाः सर्व्सिद्धि

maitrinews

स्वनिगः । माघ शुक्ल पञ्चमीया दिन हनिगु ‘श्रीपञ्चमी’ पर्व बिहीबाः विद्याया अधिष्ठात्री देवी सरस्वतीया निष्ठापूर्वक पूजा–आराधना याना हनाच्वंगु दु । चन्द्रमाथें तुुयु वर्ण दुम्हः तथा ल्हाँतय् वीणा व पुस्तक दुम्हः विद्याया देवी सरस्वतीयात भक्तजनं भारती, शारदा, हंसवाहिनी, जगन्माता, वागिश्वरी, कौमारी, वरदायिनी, बुद्धिदात्री, ब्रह्मचारिणी, चन्द्रघण्टा व भुवनेश्वरी नामं पुकारेयाई ।
विद्या व सिर्जनाया देवी जुगु करणं विशेषयाना साहित्यकार, कलाकार, पत्रकार, शिक्षक व विद्यार्थी थःथगु कला–साधनाया वस्तु कलम, कापी, कुची व वाद्ययन्त्र आदियात सरस्वतीया रूपय् पूजा–आराधना याई ।
सरस्वतीयात तान्त्रिकतयेसं तन्त्र सिद्धिया लागिं तारादेवीय् रूपय् मानेयाइगु खः ।
सूर्य उत्तरपाखे वना दिँ ताःहाक जुइगु व वसन्त ऋतु प्रारम्भ जुइगु विश्वासया नापं थुगु दिनयात ‘वसन्त पञ्चमी’ नं धाई ।
ऋग्वेदय् वाग्देवीया नामं प्रसिद्धि दुम्हः ब्रह्माया अर्धा्ङ्गिनी ब्रह्मायणीया पूजा उपासनां फुक्क प्रकारया ज्ञान, सिद्धि व सद्बुद्धि प्राप्त जुइगु उल्लेख दु ।
थुगु कारणं सरस्वती पूजायागु यक्वः महत्व दु । थौंया दिँ सरस्वतीया पूजा याना विद्या प्रारम्भ यासाः सर्व्सिद्धि प्राप्त जुई धैगु विश्वास दु ।
थौंया दिँ विवाह, व्रतबन्ध, बाराः तयेगु व इही यायेगु थजागु सामाजिक तथा धार्मिक ज्या यायेत साइत स्वय्म्वाः धैगु मान्यता दु ।
थुगु दिँ मचाःतयेत शिक्षारम्भ याकेगु व न्हाँय्–न्ह्येपँ प्वाःखनेगु शुभ मानेयाई ।
स्वनिगःया स्वयम्भू, मैतीदेवी व गैरीधाराया नीलसरस्वती, यलःया लेलेनापं मेंमेगु जिल्लाया सरस्वतीया देगःले सुथय्निसें पूजा यायेत भक्तजन, खासयाना छात्रछात्राया भीड जुई ।
सरस्वतीयात छाःगु न्हेगः अक्षता घुतुकुसाः विद्या व बुद्धि स्फुरण जुया विद्यादेवीपाखें चेतनाया ज्योति दई धैगु धार्मिक विश्वास दु ।
थुगु अवसरय् हनुमानढोका दरबारय् वसन्त श्रवण याई । वसन्त श्रवणय् राष्ट्रानायःया नातां राष्ट्रपतिं ब्वति काइगु खः ।