अन्तरराष्ट्रिय बौद्ध भावना केन्द्रया धम्महल भवन निर्माणय् महानगरया स्वंगु करोड अनुदान

येँ । भौतिक पूर्वाधार व सम्पदा पुर्न्निर्माणनापं येँ महानगरपालिकां स्वास्थ्य सेवा व सामाजिक क्षेत्रय् नं योगदान याना वगु दु । थुगु हे सन्दर्भय् महानगरपालिकां अन्तरराष्ट्रिय बौद्ध भावना केन्द्रया धम्महल भवन निर्माणया लागि आर्थिक ग्वाहाली यागु दु । येँ महानगरपालिकाकां थौं उगु केन्द्रया धम्महल भवन निर्माणया लागिं रु ३ करोड १ लाख ६९ हजार २०० रुपैयाँ अनुदान ब्युगु खः ।
येँ महानगरपालिकाया मेयर विद्यासुन्दर शाक्यं उगु रकम बरावरया चेक केन्द्रया नायः प्रतिकरत्न ताम्राकारयात लःल्हानादिल । महानगरया वडा १० शंखमुलय् ७ रोपनी ६ आना ३ पैसा क्षेत्रफलय् फैलेजुगु उगु केन्द्रयात चेक हस्तान्तरलिपा सम्वोधन यासें मेयर शाक्यं बुद्धया देश धकाः हलिंन्यंक सिकेत अन्तराष्ट्रिय बौद्ध भावना केन्द्रं यक्वः योगदान यागु धासें थजागु संस्थायात महानगरया पाखें ग्वाहाली याये दया लय्तागु धयादिल ।
‘येँ महानगरपालिकां थुकिं न्हापा नं अखिल नेपाल भिक्षु महासंघपाखें सञ्चालित नेपाल बौद्ध परियत्ति शिक्षाया लागिं पाठ्यसामग्री छपाई, दिक्षान्त समारोह, नैतिक आचरण शिक्षाया लागिं याइगु थि थि ज्याभ्वःया लागिं रु २३ लाख ६५ हजार आर्थिक ग्वाहाली यायेधुंकुगु दु,’ मेयर शाक्यं धयादिल, ‘हलिंन्यंकया बौद्धमार्गीत नेपाः चाःह्यु वइगु बुद्धजन्मस्थल लुम्बिनीं निर्माण जुयाच्वंगु नेपाल बज्रयानी महाविहारयात नं महानगरपालिकां आर्थिक अनुदान बिइगु जुगु दु ।’ मेयर शाक्यं भौतिक पूर्वाधार विकास, सहरी सेवा व्यवस्थापन व सम्पदा पुननिर्माणनापं स्वास्थ्य सेवा व सामाजिक सेवाया ख्यलय् नं ग्वाहाली यायेगु हेतुं उगु ग्वाहाली यानागु धयादिल ।
केन्द्रया नायः ताम्राकारं येँ महानगरं सम्पदा संरक्षणनापं विकास निर्माणया ज्याय् तःधंगु योगदान यागु धयादिल । वय्कलं महानगरं यागु आर्थिक ग्वाहालीं थःपिं यक्वः उत्साहित जुगु सामाजिक सेवा व बौद्ध दर्शनया प्रवर्धनया लागिं ज्या यायेत थप ग्वाहाली जुइगु विश्वास व्यक्त यानादिल ।
ज्याभ्वःले प्रदेश सांसद गणेशप्रसाद दुलाल, उपमेयर हरिप्रभा खड्की श्रेष्ठलगायतं नं ब्यति कयादिगु खः ।