बसं ठक्कर बिया नायिका महिमा सिलवाल तताकेहेँ निम्हः सित

maitrinews

येँ । बसं ठक्कर बिया नेपाली चलचित्रया नायिका महिमा सिलवाल व वय्कया केहेँ निम्हः सिगु दु ।
धादिङया गजुरी इलाका प्रहरी कार्यालयया कथं बुधबाः सन्याँइले पौने ६ बजेपाखें धादिङया गजुरी–२, चम्बासय् नायिका सिलवाल व वय्कया केहेँ सर्मिला सवार स्कुटरयात विपरीत दिशां वयाच्वंगु बसं ठक्कर बिया निम्हःसिया मृत्यु जुगु खः ।
गजुरी इलाका प्रहरी कार्यालयया डीएसपी खगेन्द्रराज खड्काया कथं ठक्करं गम्भीर घाःपा जुम्हः २२ वर्षीया महिमाया वासःया भ्वलय् गजुरी स्वास्थ्य केन्द्रय् मृत्यु जुगु खः । अथेहे वय्कया केहेँ २० वर्षीया सर्मिलाया वासःया भ्वलय् येँया ट्रमा सेन्टरय् मृत्यु जुगु खः ।
डीएसपी खड्काया कथं सिलवाल तताकेहेँ बा ९८ प ७०५८ नम्बरया स्कुटरय् येँपाखें थःगु छेँ भरतपुर महानगरपालिका–१२ शिवनगर वनाच्वंगु खः । उगु भ्वलय् भैरहवां काठमाडौंपाखें वयाच्वंगु लु २ ख १३५ नम्बरया बसं तताकेहेँ सवार स्कुटरयात ठक्कर ब्युगु खः ।
ठक्कर ब्युगु बससहित चालक पाल्पाया रन्जित गौतमयात नियन्त्रणमा कागु दु ।
नायिका महिमां ‘कारबाही’ चलचित्रपाखें डेब्यु यागु खः । नापं अप्रिल फुल, चियर्स, दानव, जिग्लोनापं चलचित्रय् ज्या यायेधुंकुगु दु ।
महिमां दर्जनस्वयाँ अप्वः म्युजिक भिडियोय् नं ज्या यायेधुंकुगु दु ।