यलःय् तजिक हन सम्यक महादान

maitrinews

यल । थुगु वर्षया फागुण १४ व १५ गते यलया नागबहालय् सम्यक महादान तजिक हन । यलय् न्यादँया छकः हनिगु सम्यक महादान विगत ७०० वर्षनिसें मद्धिक्क हनावगु दु । थुगु पर्वया न्हापांगु दिँ चान्हें स्वनिगःया थि थि विहार व महाविहारपाखें हगु १२६ दिपंकर बुद्धका प्रतिमा यल दरबार क्षेत्रय् तयातगु खः । उकिंलिपा दिपंकर बुद्ध, आर्यावलोकितेश्वर, बसुन्धरादेवी, आर्यतारा लगायत द्योपिन्त परम्परागत बाजागाजाया नापं नागबहालय् बिज्याकुगु खः । व बिहिबाः द्योपिन्त झोलाकः तया महाविहारया २० म्ह ज्येष्ठ व्यक्ति अर्थात् आजुतयेसं विशेष पुजा याना दान बिइगु परम्परा दु । थ्वहे दान बिइगु हे पर्वया मू सार खः ।
हरेक वर्ष न्ह्यानावगु थुगु पर्व विसं १८६२ साल निसें धासा न्याँदया छक न्ह्यागु खः । रणबहादुर शाहं गुठीया जग्गा सरकारी यायेगु सुरु यायेधुंका गुठीया आयस्रोत म्ह्वः जुया न्याँदया छक थुगु महादान पर्व आयोजना यागु खः । विशेष याना बौद्ध धर्मावलम्बीतयेसं तजिक हनावगु सम्यक महादान नेपाल संवत ४२५ स्वयाँ सुरु खः । येँ १२ वर्षय् छक स्वयम्भूयाभुइख्यँले, यलय् न्याँलया छक नागबहाल व ख्वपँय् प्रत्येक वर्ष सम्यक महादान हनावगु दु । थुगु दानय् दीपंकर बुद्धनापं सकसितं भूमिइ उब्जाउ जुइगु अन्न, गेडागुडी, फलफूल व मिठाई दान यायेगु चलन दु ।
सम्यक महादान बुद्ध जुइपिं बोधिसत्वपिंके मदयेक मगागु १० पारमिता गुणमध्येया न्हापांगु दान पारमिता गुण पूरा यायेगु मार्ग खः । सम्यक दानय् थःगु गच्छेकथं दान बिइगु प्रचलन दु । थथे दान यासा पुण्य प्राप्त जुइगु तथा बोधी ज्ञानया मार्गय् प्रतिष्ठित जुया निर्वाणय् थ्यंकिगु राग, द्वेष, लोभ आदि मारगुण नाश यानाबिगु जनविश्वास दु ।