बुद्धया वाः दुगु देँगः

maitrinews

 

श्रीलंकाय् छगु देँगः दु, गन शान्तिया प्रतीक गौतम बुद्धकया छपँु वाः तयातगु दु । दन्त मन्दिरया नामं समेत परिचित उगु देँगःले च्वंगु वाः यक्वः हे शक्तिशाली जुगु जनविश्वास दु । गौतम बुद्धया निधन ईसापूर्व ४८३ य् जुगु खः । बुद्धया देहत्यागलिपाः वसपोलया अन्तिम संस्कार भारतया कुशीनगरय् जुगु खः । उगु भ्वलय् बुद्धया छम्ह अनुयायीं वसपोलया चिताय् वनाः बुद्धया च्यानाच्वंगु शवं छपँु वाः लिकानाः उगु वाः राजा ब्रम्हादत्तयात बिल ।
राजा ब्रम्हादत्तयाके बुद्धया उगु वाः ताःईतक्क च्वन । बुद्धया वाःया विषयय् कयौंपटक युद्धसमेत जुल । युद्धया हे भ्वलय् ब्रम्हादत्त राजायात बुकाँ मेम्ह राजां उगु वाः ल्हाँतये काल । अन्त्यय् बुद्धया छम्ह अनुयायीं उगु वाः राजाया दरबारं खुयाँ काल व उकियात श्रीलंका यंकल । उगु इलय् श्रीलंकाया राजधानी क्यान्डी सहर खः । अनया राजां बुद्धया अनुयायीं हँगु बुद्धया वाः तयेत विशाल देँगः दयेकल व उगु भव्य देँगले बुद्धया वाः स्थापित यात ।
सन् १६०३ य् पोर्चुगिसतयेसं श्रीलंकाय् आक्रमण याना उगु बुद्धया वाः लाकाः यंकुगुु खः । तर लिपा वाः क्यान्डी हे लितहल । व छगः बाकसदुने तया उगु हे देँगले तल । बुद्धया वाःया दर्शनया लागिं हरेक वर्ष द्धलँद्ध मनूत अन वयेगु याई ।