जबर्जस्ती नेपाल प्रवेश याये त्यंपिं समूह व प्रहरीदथुई गौरीफन्टा नाकाय् झडप

maitrinews

 

कैलाली । भारतं वपिं नेपाली जबरजस्ती नेपाल प्रवेश यासेंलि कैलालीया त्रिनगर गौरीफन्टा नाकाय् झडप जुगु दु ।

मंगलबाः सुथय् अप्वः ल्याखय् दुपिं नेपालीं जबरजस्ती प्रवेश याये त्यनां सुरक्षाकर्मीनापं झडप जुगु खः ।

सरकारं मंगलवाःनिसें निषेधाज्ञा लकडाउन यागु दु । जिल्ला प्रशासन कार्यालय कैलालीं सोमबाः २ बजेनिसें हे लागू जुइगु याना जिल्लान्यंक निषेधाज्ञा जारी यागु खः ।

निषेधाज्ञाया इलय् भारतं लिहाँवपिं ३०० नेपाली गौरीफन्टा नाकाय् रोकेयागु दु ।

सरकारं नाकां दुतमहयेत निर्देशन ब्युगु दु । तर गौरीफन्टा नाकाय् रोकेयापिंमध्ये गुलिसिनं ढुंगामुढा यागु कैलालीया सहायक प्रमुख जिल्ला अधिकारी शिवराज जोशीं धयादिल ।

आः गौरीफन्टा नाका अप्वः ल्याखय् नेपाल प्रहरी, शसस्त्र प्रहरी परिचालन यागु दुु । नाकाय् रोकेयानातपिं नेपालीयात प्रवेश याकेया लागिं गृह मन्त्रालयया आदेश पियाच्वनाग सहायक प्रमुख जिल्ला अधिकारी जोशीं धयादिल ।

वय्कया कथं नेपाल प्रवेश यापिन्त गन्तव्यतक्क थ्यंकेत पहल जुयाच्वंगु दु । सशस्त्र प्रहरीं माईकिङ यासें सीमाय् थ्यंपिं नेपालीतयेनापं जिल्लागत विवरण माग यागु दु ।