भारतया १ अर्ब ३० करोड जनता स्ववाः ताःहाकगु लकडाउनय्

maitrinews

नयाँदिल्ली । भारतया दक्वः जनसङ्ख्या स्ववाः ताःहाकगु कडा बन्देज अर्थात् लकडाउनय् च्वनेत बाध्य जुगु दु । प्रधानमन्त्री नरेन्द्र मोदीं देशया १ अर्ब ३० करोड जनतायात थःगु सुरक्षाया नितिं सुनं छेँ पिने मवयेत आह्वान यागु दु । अन्यथा भारत दशकौं ल्युने वनिगु वय्कलं धयादिल ।

टेलिभिजनय् वय्कलं यानादिगु सम्बोधन नापं पसःतयेके मागु किनमेल यायेत मनूतयेगु भिड लगेजुगु खः । भारतय् आःतक्क ५०० स्वयाँ अप्वः कोरोनाभाइरस सङ्क्रमण खनेदुगु दुसाः ९ म्ह सिगु बिबिसीं धागु दु ।

हलिंन्यंक सङ्क्रमणया ल्याः ४ लाख पलेधुंकुगु जोन हप्किन्स विश्वविद्यालयं धागु दु । अथेहे १८००० स्वयाँ अप्वःसिया ज्यान वनेधुकुगु दु ।

भारतीय प्रधानमन्त्री नरेन्द्र मोदीं देँन्यंक वयेवने तथा घुमफिरय् बन्देज याना कोरोनाभाइरस सङ्क्रमण फैलेजुइगु पाखें रोकेयाये चाहेजुगु धयादिल । उगु बन्देज वंगु मध्यचान्हेंनिसें लागु जुगु दु व वइगु २१ दिनतक्क जारी जुई ।

छिकपिँत छेँ पिने वनेत पूर्ण बन्देज जुई, मोदीं धयादिल । वय्कलं मनूतयेत आत्तेमजुइत धागु दु तर नापं राजधानी दिल्लीया पसःतयेके भिड जुल । सम्वाददातातयेसं धाल, बन्देजया इलय् मनूतयेत नयेगु तथा मेमेगु अत्यावश्यक वस्तु किनमेल यायेत गथेयाई धैगु प्रस्ट यागु मदु ।

भारतय् थजागु लकडाउनुया परिणाम छु जुई धाये मफु । थुकिया आर्थिक तथा सामाजिक परिणाम जुईफु । तर विश्वव्यापीरूपय् फैलेजुगु सङ्क्रमणया न्ह्योने थुगु उपाय जरुरी जुगु नं आंकलन यागु दु ।