हरेक मृत्युयात कोरोनानापं जोडेमयायेत स्वास्थ्य मन्त्रालयया इनाप

maitrinews

येँ । स्वास्थ्य तथा जनसंख्या मन्त्रालयं हरेक मृत्युयात कोरोना भाइरसनापं जोडेमयायेत इनाप यागु दु । गाँगामय् सुयानं ज्यान वंसाः नं कोरोनानापं जोडेयायेगु यागु धासें मन्त्रालयं दक्वः मृत्युयात कोरोनानापं जोडेमयायेत इनाप यागु खः ।

नियमित पत्रकार सम्मेलनय् मन्त्रालयया विज्ञ सल्लाहकार डाक्टर खेम कार्कीं कोरोनाया हे कारणं सित धैगु अफवाह फैलेयागु कारणं सिथँ मवनिगु यागु खबर वगु धासें अथे मयायेत नं इनाप यानादिल । वय्कलं ५ नसें १० प्रतिशत नागरिकयात जक अस्तपालमा भर्ना यायेमागु कारणं कारोनाया कारणं ज्यान गुमेयाइपिनिगु दर कम जुइगु धयादिल । छुं कारणवश ज्यान वँसा नं कोरोनाया हे कारण ज्यान वन धैगु भ्रम मतयेत इनाप यागु दु । नेपालय् आःतक्क कोरोनाया संक्रमण विदेशं लिहाँवपिनिके जक खनेदुगु धयादिल ।

मन्त्रालयया प्रवक्ता डाक्टर विकास देवकोटां आःतक्क ९९३ नमूना परीक्षण यागलिं न्याँमहसिके जक कोरोना पुष्टी जुगु जानकारी बियादिल । अथेहे वय्कलं चीनपाखें हगु स्वास्थ्य परीक्षण नापंया सामग्री दक्वः प्रदेशय् थ्यंकेगु धयादिल ।

वय्कया कथं धनगढी, सुर्खेत व विराटनगरय् हेलिकोप्टरपाखें सामग्री थ्यंकुगु दुसाः मेंमेगु जिल्लाय् गाडीपाखें सामग्री छ्वँगु दु । अथेहे वय्कलं कोरोनाया नमूना परीक्षण दक्वः प्रदेशय् थ्यंकेगु धयादिल । धरानय् १९ नमूना परीक्षण जुयाच्वंगु जानकारी ब्युसें याकनं मेंगु प्रदेशय् नं सेवा विस्तार यायेगु धयादिल ।