कोरोना संक्रमण निक्वःगु विश्वयुद्धलिपाःया तःधंगु चुनौतीः संयुक्त राष्ट्र संघ

maitrinews

अमेरिका । गत डिसेम्बरय् चीनया वुहानपाखें सुरु जुगु कोरोना भाइरसया संक्रमणं आः हलिंया थ्यंमथ्यं २०० मुलुकय् फैलेजुईधुंकुगु दु । बुधबाः सुथय्तक्क कोरोना भाइरसया संक्रमणं ४२००० स्वयाँ अप्वःया मृत्यु जुईधुंकुगु दुसाः ८ लाख ५९००० स्वयाँ अप्वः संक्रमित जुगु दु ।

थुकिंदथुई संयुक्त राष्ट्र संघया महासचिव एन्टोनियो गुटेरेसं कोरोना भाइरसया संक्रमण दोस्रो विश्वयुद्धलिपाःया दकले तःधंगु चुनौती जुगु धयादिगु दु । विश्वव्यापी महामारीया रुप कागु कोरोना भाइरस संक्रमणं जुईफुगु सामाजिक तथा आर्थिक प्रभावबारेया रिपोर्ट सार्वजनिक यासें महासचिव गुटेरेसं हलिंया न्ह्योने दोस्रो विश्वयुद्धलिपाः दकले तःधंगु चुनौती वगु धयादिगु खः ।

महासचिव गुटेरेसं कोरोना भाइरसया प्रभावं विश्व अर्थतन्त्रयात तःधंगु धक्का जुइगु नं धयादिगु दु । आःतक्क गबलें नं खनेमदुनिगु तहया आर्थिक मन्दी निकट भविष्यय् वयेफुगु चेतावनी वय्कलं बियादिल ।

महासचिव गुटेरेसं कोरोना भाइरसया नियन्त्रण तथा रोकथामया लागिं विश्वव्यापी रुपय् अझ कडा व प्रभावकारी कदम न्ह्याकेमागु धयादिल । राजनीतिक कासाः पिनेवया दक्वः छथाय् हे मुनाः कोरोना महामारीविरुद्ध त्याकेमागु नं वय्कलं धयादिगु दु । ‘संयुक्त राष्ट्र संघया ७५ वर्षया इतिहासय् जिमिसँ थजागु विश्वव्यापी स्वास्थ्य संकट खँनागु मदु ।’ महासचिव गुटेरेसं धयादिल, ‘कोरोना भाइरस संक्रमण स्वास्थ्य संकट जक मखु । थ्वः मानव संकट नं खः । कोरोना भाइरस संक्रमणं समाजया कन्द्रय् प्रहार यागु दु ।’

महासचिव गुटेरेसं यक्वः देशं विश्व स्वास्थ्य संगठन९डब्लूएचओ० या गाइडलाइन पालना मयासे थःखुसी कोरोना भाइरसया संक्रमण रोकथाम व नियन्त्रणय् लगेजुगु नं धयादिल ।