निजी अस्पतालयात कोरोना संक्रमितया उपचार यायेत सर्वोच्चया आदेश

maitrinews

येँ । सर्वोच्च अदालतं निजी स्वास्थ्य संस्थां समेत कोरोना संक्रमितया उपचारया व्यवस्था मिलेयायेत अन्तरिम आदेश जारी यागु दु । न्यायाधीश मनोजकुमार शर्माया एकल इजलासं निजी स्वास्थ्य संस्थां छुं नं वहानाय् संक्रमणया उपचारपाखें लिचिले मज्युगु आदेश ब्युगु खः । उपचारय् संलग्न जुइपिं चिकित्सकनापंया दक्वः स्वास्थ्यकर्मीयात व्यक्तिगत सुरक्षाया सामाग्री उपलब्ध याकेत नं इजलासं आदेश यागु दु ।

अदालतं निजी अस्पतालय् उपलब्ध दुगुतक्कया बेड, आइसियु कक्ष, भेन्टिलेटरनापंया कोरोना संक्रमितया उपचारया लागिं मागु सेवा कायेत व सोसम्बन्धी व्यवस्था मिलेयायेत नं आदेशय् धागु दु । अन्तरिम आदेशय् धागु दु, छुं नं निजी स्वास्थ्य संस्थायात छं बहानाय् नं कोरोना संक्रमणया उपचार यायेत लिचिलेगु व उगु उपचारया ज्यां विमुख जुइगु अधिकार खनेमदु ।

उकिं निजी स्वास्थ्य संस्थाय् उपलब्ध जुगुतक्कया बेड, आइसियु कक्ष, भेन्टिलेटर नापंया कोरोना भाइरसया उपचारया लागिं मागु सेवा बिइत आवश्यक व्यवस्था मिलेयायेग व स्वास्थ्य सेवाय् संलग्न चिकित्सक, परिचारिका, एम्बुलेन्स चालक, सफाइ श्रमिक, वासः उत्पादन वितरण यायेगु ज्याय् संलग्न जुपिं श्रमिकत तथा जनताया दैनिक उपभोग्य वस्तुया उत्पादन तथा आपूर्ति यायेगु ज्याय् संलग्न व्यक्तितयेत कोरोना संक्रमणं जोगेयायेया लागिं इमिगु ज्याया प्रकृतिया आधारय् ज्याय् तगु संस्थापाखें आवश्यक व्यक्तिगत सुरक्षा सामाग्रीया यथोचित प्रबन्ध याना ज्याय् लगेयायेगु व्यवस्ता मिलेया धकाः विपक्षीतयेगु नामय् अन्तरिम आदेश जारी यागु दु ।