कोरोनापाखें इटलीं सच्छिँम्ह चिकित्सकया मृत्यु, १० प्रतिशत सङ्क्रमित

maitrinews

रोम । इटलीं कोरोना भाइरस सङ्क्रमण लुयावगु दिननिसें आःतक्क सच्छिँम्ह चिकित्सकया कर्तव्य पालनाया भ्वलय् मृत्यु जुगु इटलीया स्वास्थ्य स्वास्थ्य संस्थां जानकारी ब्युगु दु । इटलीं कोभिड–१९ या सङ्क्रमण विरूद्ध अग्रपङ्तीं च्वना विरामीयात उपचार सेवा बिइगु भ्वलय् १०१ म्ह चिकित्सकया मृत्यु जुगु दु, संस्थाया प्रवक्तां एएफपीयात धाल ।

मृतकमध्ये सेवा निवृत्त चिकित्सक, इमितः सरकारं सङ्क्रमणया महामारीं ग्वाहाली यायेत आह्वान यागु खः, नापं नकतिनिं सेवा सुरू यापिं युवा चिकित्सकसमेत दु ।

इटलीया सञ्चारमाध्यमं सङ्क्रमणपाखें ३० म्ह परिचारिका व मेपिं स्वास्थ्य सहयोगीया मृत्यु जुगु अनुमान यागु समाचार पिनेवगु दु ।