येँ । नेपाःया दकले ताःहाकःगु जात्रा कथं कयातःगु यलय् याइगु रथजात्रा बुंगद्यः करुणामय (रातो मच्छिन्द्रनाथ)या जात्रा स्थगित जूगु दु ।
म्हिगः बिहिवाः बुंगद्यःयात यलया लगंख्यलय् न्हवं याःगु खःसा थौं शुक्रवाःनिसें न्ह्याइगु उगु बुंगद्यःया रथ दयेकेगु ज्या स्थगित जूगु गुथि संस्थान व ज्यापु समाज यलं मंकाः विज्ञप्ति सार्वजनिक यानाः जानकारी ब्यूगु खः ।
म्हिगः बिहिवाः विधिकथं बुंगद्यःयात म्वः ल्हुइकाः न्हवं याःगु खःसा थौं
शुक्रवाःनिसें रथ निर्माण यायेगु ज्या न्ह्याकेमाःगु खः ।
तर कोरोना भाइरस कोभिड १९ संक्रमणया महामारीया हुनिं ब्वलंगु विषम् परिस्थितिया हुनिं रथया जग तयेगु व निर्माण ज्या स्थगित जूगु खः ।
स्थगित जूगु बुंगद्यःया रथ निर्माणया ज्या लकडाउन क्वचायेधुंकाः क्षमापूजा यानाः न्ह्याकेगु निर्णय जूगु गुथि संस्थान व ज्यापु समाज यलं मंकाः विज्ञप्ति सार्वजनिक यानाः जानकारी ब्यूगु दु ।
रथया जग तयेगु न्हापांगु दिं बिहिवाःतक रथजात्रा याकेगु वा मयाकेगु विषयस अन्योलय् हे लाःगु खः ।
लिच्छवीकालनिसें निरन्तर रुपं न्ह्यानाः वयाच्वंगु बुंगद्यःया रथजात्रा नेपाःया हे दकले ताःहाकःगु जात्रा कथं कयातःगु दु । बैशाख कृष्णपक्षया पारुनिसें न्ह्याइगु उगु जात्राय् बैशाख शुक्लपक्षया पारुया दिंनिसें रथजात्रा न्ह्याकेमाःगु प्रचलन दूगु खः ।
