बुद्ध जयन्ती ः त्रीसंयोय पूर्ण पवित्र दिँ

maitrinews

प्रत्येक वर्ष वैशाख शुक्ल पूर्णिमाया दिँ बुद्ध जयन्तीयात भगवान् गौतम बुद्धया जन्म जयन्तीया रुपय् मानेयाइगु खः । नापं वसलोलं थुगु हे दिँ बुद्धत्व प्राप्ती याना बिज्यागु खः साः वसपोलया महापरिनिर्वाण नं वैशाख शुक्ल पूर्णिमा दिँ हे जुगु खः । थुगु कारणं वैशाख पूर्णिमा त्रीसंयोगं पूर्ण पवित्र दिँ खः ।
नेपाःया लुम्बिनीं २५६० वर्ष न्हापा सिद्धार्थ गौतमया जन्म वैशाख शुक्ल पूर्णिमाया दिँ जुगु खः । विलासी जीवन बितेयाना च्वम्हः, अथेहे दुःख धैगु छु धका हे मस्युम्हः राजा शुद्धोधनया काय् सिद्धार्थं छन्हु दरवार पिने चाह्यु वनिगु झ्वललय् प्यंगु निमित्त रोगी, बृद्ध, सिम्हः व छम्हः शान्त भिक्षु खनः । रोगी, बृद्ध, सिम्हः खना छन्हु जिनं थथेहे रोगी जुई तिनी, बृद्ध जुई तिनी, हाकनं छँहु सीं नं मानी धैगु सिँकाः मन विचलित व चिन्तित जुल । आः जिं थ्वः दुःखं मुक्त जुइगु लःपु मालेमा धैगु बिचाः याना सिद्धार्थ २९ वर्षया उमेरय् राज दरबारया सुख फुक्कः त्याग याना शान्तिया मालेया नितिं पिहाँ बिज्यात ।
खुदँ तक्कः दुष्कर तपश्या याना ३५ वर्षया उमेरय् भारतया बुद्धगयास्थित बोधिवृक्ष सिमा क्वय् वैशाख शुक्ल पूर्णिमाया हे दिने सिद्धार्थं जीवनया सम्पूर्ण अन्धकारयात नाश याना बुद्धत्व प्राप्ति याना बिज्यात । सम्पूर्ण ज्ञानयात यथार्थ रुपं थुइका बुद्धत्व प्राप्त यायेधुंका वसपोल सिद्धार्थ गौतम बुद्ध जुल ।
बुद्धत्व प्राप्तिलिपाः वसपोलं निरन्तर ४५ वर्षतक्कः गाँ–गाँ, नगर –नगर चारिका यासें बहुजन हित , बहुजन सुखया नितिं शान्ति, अहिंसा, मैत्री व करुणाया शिक्षा बिया भव संसारं मुक्त जुइगु निर्वाणया लः केना बिज्यात । वसपोलया उपदेश थौं तक्कः नं उलिहे सान्दर्भिक जु ।
४५ वर्षतक्कः अनवरत रुपं अप्वं मनुतयेगु हित सुखया लागिं उपदेश बिया बिज्याना वसपोल कुसीनगर बिज्यात । उबले वसलोल ८० वर्ष थ्यने धुंकुगु खः । वैशाख पूर्णिमाया चान्हें सम्पूर्ण संस्कार धर्म अनित्य खः धैगु सन्देश बिया बिज्यासें थःगु नश्वर शरिर त्याग याना बिज्यात । थुगु कारणं वैशाख पूर्णिमा त्रिसंयोय पूर्ण पवित्र दिँ खः ।

तर थ्वः वर्ष बुद्धजयन्ती समारोह समितिं छेँ हे च्वना बुद्धपूजा याना २५६४ औं बुद्धजयन्ती हनेत अपिल यागु दु ।

कोरोना रोकथाम तथा नियन्त्रणया लागिं जारी लकडाउनं याना थुगु वर्षया बुद्धजयन्ती औपचारिक समारोह याना हनेत मिलेमजुगु हुनिं समितिं उगु अपिल यागु खः ।
लिपांगु वर्षतयेके थि थि बौद्ध संस्थातयेसं थःथगु तरिकां बुद्ध जयन्ती हनावगु खः । तर, कोरोना माहामारीया हुनिं लिपांगु वर्षतयेके थे बौद्ध विहारय् भेला जुया बुद्धजयन्ती हने मफैगु समितिया नायः भिक्षु मैत्री महास्थविरं धयादिगु दु ।