स्वनिगः प्रवेशया दक्वः नाका सील जुइगु, प्रवेश विन्दुइहे रोक यायेत गृहया निर्देशन

maitrinews

येँ । गृहमन्त्रालयं लकडाउन ईतक्क अत्यावश्यक बाहेकया ज्याय् स्वनिगः प्रवेशय् निषेध यायेगु निर्णययात कार्यान्वयन यायेत स्वनिगःया दक्वः स्थानीय तहयात इनाप यागु दु । स्वनिगःया जनप्रतिनिधिया खँल्हाबलालिपा गृहं थजागु निर्णय याना कार्यान्वयनय् हयेत्यगु खः । जेठ १ गतेया मुज्याय् जुगु खँल्हाबलाया निर्णययात कार्यान्वय यायेगु धासें गृहं स्वनिगःया दक्वः स्थानीय तहयात थजागु इनाप यायेधुंका आः स्वनिगः प्रवेशय् थप कडाई जुइगु जुगु दु । गृहमन्त्री रामबहादुर थापा बादलया अध्यक्षताय् जेठ १ गते जुगु मुज्याय् स्वनिगः नगरपालिका फोरमया पदाधिकारी, स्वनिगःया नाकानापं जोडेजुगु स्थानीय तहया प्रमुख–उपप्रमुख, स्वनिगःया प्रमुख जिल्ला अधिकारी व सुरक्षा निकायया प्रमुख सहभागी जुयादिगु खः । गृहं स्वनिगःया दक्वः स्थानीय तहयात कार्यान्वयनया लागिं छ्वँगु पौंलय् स्वनिगः प्रवेशया दक्वः नाका अत्यावश्यक प्रयोजन बाहेक पूर्णरुपय् सील यायेत इनाप यागु दु । सुलासुला जुइगु प्रवेशयात समेत पूर्ण रुपं रोकेयायेत इनाप यागु दु ।

‘नाका प्रवेशया स्थानीय तहनापं स्वनिगःया दक्वः स्थानीय तहतयेसं स्थानीय प्रशासननापं समन्वय याना थःथगु क्षेत्रय् च्वगु होटल, पार्टी प्यालेस, सामूदायिक भवन व मेंमेगु संभाव्य स्थलतयेत क्वारेन्टायन च्वनिम्ह व्यक्ति स्वयंमं क्वारेनटायन खर्च भुक्तानी यायेगु याना स्म्भावित क्वारेन्टाइन प्रयोजनया लागिं लागत संकलन व मेंमेगु व्यवस्थापनया ज्या न्ह्याकेगु,’ पौंलय् धयातगु दु, ‘स्वनिगलय् अत्यावश्यक ज्याय् प्रवेश यायेमापिं सुं व्यक्तिं स्वनिगः प्रवेश पूर्व हे स्वयं थःगु खर्चय् उपलब्ध जुगुतक्क आरडीटी परीक्षण याना उगु रिपोर्ट नापं स्वनिग प्रवेश अनुमतिया लागिं माग यायेगु ।’
पौंलय् स्वनिगः प्रवेश विन्दुइ वइगु सवारी साधन प्रवेश विन्दुइ थ्यने न्ह्यो हे सुरु प्रस्थान जिल्लाय् हे सुरक्षा निकायं विशेष निगरानीया साथ रोकेयायेगु व आगमनय् कडाई यायेगु नं उल्लेख दु ।