भारत व चीनया सेनादथुई लद्दाखय् भिडन्त, २० म्ह भारतीय सैनिकया मृत्यु

maitrinews

लद्दाख । भारतीय सेनां पूर्वी लद्दाखया गलवान उपत्यकाय् सोमबाः चान्हें चिनियाँ सेनानापं जुगु झडपय् थः २० सैनिकया मृत्यु जुगु स्वीकार यागु दु ।
भारतीय सेनां चीननापंया भीषण झडपय् थः १७ सैनिका घाःपन जुगु व शून्य डिग्रीस्वयाँ कम तापक्रम दुगु गलवान उपत्यकाय् इमिगु मृत्यु जुगु धागु दु । थकिं न्हापा भारतीय सेनां चीननापंया झडपय् छम्ह कर्नेल व निम्ह सैन्य जवानया जक मृत्यु जुगु धागु खः ।
भारतीय सेनां मंगलबाःचान्हें २० म्ह मृत्यु जुगु औपचारिक रुपय् पुष्टि जुगु खः । नापं भारत व चीनया सेनादथुई झडप बन्द जुगु जनाउ नं ब्युगु दु ।
भारतया सरकारी समाचार संस्था पीटीआईं भारत व चीनया सेनादथुई छुं घण्टातक्क भीषण झडप जुगु धागु दु । झडपय् कयौँ भारतीय सेना घाःपा व बेपत्ता जुगु दु । एएनआईं सरकारी स्रोतयात उद्धृत यासें थ्वः ल्याः अझ अप्वयेफुगु धागु दु ।
पूर्वी लद्दाखया गलवान क्षेत्रय् सोमबाः चान्हें निगु हे पक्षया सैनिकदथुई हिंसात्मक झडप जुगु भारतीय व चिनियाँ सेनां छुट्टाछुट्टै रुपय् पुष्टि यागु दु । झडपमय् चिनियाँ सेनापाखे नं हताहती जुगु भारतीय सेनां दाबी यासाः नं चिनियाँ पक्षं थकिया पुष्टि यागु मदु ।
लद्दाखया सीमा क्षेत्रय् लच्छिँनिसें भारत व चीनया सैनिक आमनेसामने जुईधुंका तनाव अप्वःगु खः । उकिंया निकास मालेत जुन ६ या दिन निग देशया सैन्य अधिकारीदथुई वार्ता जुगु खः । उगु इलय्निसे मद्धिक्क यक्वः चरणया वार्ता जसाः नं तनाव धासाः कम जुगु मदु ।
लिपांगु ई लद्दाखय् निगु पक्षं भौतिक संरचना निर्माणया गति व सेना तथा हतियारया ल्याः वृद्धि यानाच्वंगु दु ।
भारतीय विदेश मन्त्रालयंजुन ६ लय् जुगु सहमति चीनं क्वथगु द्वपँ ब्युगु दु । अथेहे चिनियाँ विदेश मन्त्रालयं थःगु सीमाये भारतीय सेना वगु हुनिं झडप जुगु प्रतिक्रिया ब्युगु दु ।
विवाद समाधानया लागिं आः निगु हे देशया सैन्य तथा सरकारी वरिष्ठ अधिकारीदथुई वार्ता जुयाच्वगु नं धागु दु ।
सन् १९७५ लिपाः न्हाांगु पटक चीन नापंया सीमा नियन्त्रण रेखाय् जुगु झडपय् भारतीय सेनाया ज्यान वगु खः । थुकिं न्हापा सन् १९७५ य् निगु देशया सेनादथुई अरुणाञ्चलया तुलुङलाय् गोली चलेजुया असम राइफल्सया प्यम्ह जवानया ज्यान वंगु खः । थुकिं न्हापा सन् १९६२ य् भारत व चीनदथुई लच्छि युद्ध जुगु खः ।