प्रिमियर लिगया उपाधि लिभरपुलयात

येँ । इङ्ग्लिस प्रिमियर लिगया उपाधि लिभरपुलं त्याकुगु दु । म्हिँग चान्हें जुगु कासाय् लिगया निगुगु स्थानय् दुगु म्यानचेस्टर सिटी चेल्सीनापं पराजित जुईधुंका लिभरपुलं लिग उपाधि त्याकुगु खः ।
म्हिँग चान्हें जुगु कासाय् चेल्सीं सिटीयात १ या विरुद्ध २ गोलं बुकुगु खः । स्टामफोर्ड ब्रिजय् जुगु कासाय् क्रिस्टियन पुलिसिकं घरेलु टोली चेल्सीयात अग्रता ब्युगु खः । पुलिसिकं ३६ औं मिनेटय् गोल यागु इलय् चेल्सी न्हापांगु हाफय् छगु गोलं न्ह्योने लातः ।
निगुगु हाफय् केभिन डि ब्रुइनं गोल यासें सिटीयात बराबरीं हलः । ब्रुइनं ५५ औं मिनेटय् गोल यागु खः । तर, कासाय् ७८ औं मिनेटय् विलियनया गोलय् चेल्सीं कासाय् हाकनं
अग्रता कालः । कासाःया ७७ औं मिनेटय् फर्नान्डिनो रेड कार्ड कया पिनेवनेधुंका १० कासामि सीमित सिटीं गोल गोल याये मफुत । व, चेल्सीं २÷१ गोल अन्तरया जित लिकातः ।
चेल्सीनापं सिटी पराजित जुईधुंका लिभरपुलं प्रिमियर लिगया उपाधि त्याकुगु दु । ३१ कासाय् ८६ अंक हगु लिभरपुलं लिग उपाधि सुनिश्चित याना समान ३१ कासाः म्हिता ६३ अंक जोडेयागु म्यानचेस्टर सिटी निगुगु स्थानय् दु । अथेहे ५५ अंक जोडेयागु लेस्टरसिटी स्वंगुगु स्थानय् दुसाः चेल्सी न्याँगुगु स्थानय् दु ।
थ्वः नापं लिभरपुलं ३० वर्षलिपा प्रिमियर लिगया उपाधि त्याकुगु खः ।
लिभरपुलं उपाधि त्याकेधुंका हजारौं ल्याखय् समर्थक लिभरपुलया घरेलु मैदान एनफिल्डय् जम्मा जुगु खः । आधा घन्टा दुने हे प्रविबन्धया बावजुत २ हजार स्वयाँ अपवः समर्थक एनफिल्डय् जम्मा जुगु धागु दु ।