हरिशयनी एकादशीं छेँ तुलसी म्हाँ पितः

maitrinews

येँ । मानव जीवनय् महत्वपूर्ण मानेयाइगु बनस्पती तुलसी म्हाँ छेँ–छेँ प्युगु दु ।
आषाढ शुक्ल एकादशीया दिन तुलसी पिइगु प्रचलन दु । हिन्दू धार्मिक मान्यता कथं थौंनिसें भगवान् विष्णु क्षीरसागरय् द्यना बिज्याइगु जुया थुगु एकादशीयात हरिशयनी एकादशी धाई ।
तुलसीयात भगवान् विष्णुया स्वरुपया रूपय् काई । छेँपिने तथा मठय् तुलसीया म्हाँयात वइगु प्यलातक्क नित्यपूजा याना हरिबोधनी एकादशीया दिन साङ्गे याइगु शास्त्रीय परम्परा दु ।
हरिबोधनी एकादशीं भगवान् विष्णु जागेजइगु शास्त्रीय मान्यता दु । वैज्ञानिक रुपय् नं तुलसीपाखें अप्वः अक्सिजन दइगु तथ्य प्रमाणित जुगु दु ।
तुलसीयात आयुर्वेदिक दृष्टिं वासःया रुपय् समेत उपयोग याई ।
थौं सुथय्निसें हे येँया बूढानीलकण्ठस्थित नारायणस्थान, स्वनिगःया प्यम्ह नारायण देँगःनापं देँन्यंकया विष्णु देँगलय् पूजाआजा तथा धार्मिक अनुष्ठानया लागिं भक्तजन वगु दु । थ्वः पटक लकडाउन जुगु जुया विगतय् थेँ भिडभाड धासाः कम जुगु दु ।